ირაკლი კობახიძე „აგენტების რუსულ კანონთან“ დაკავშირებით საქართველოში განვითარებულ პროტესტს და ამაზე საერთაშორისო გამოხმაურებას, ამჯერად გლობალური ომის პარტიის ინტერესებს უკავშირებს. „ქართული ოცნების“ თავმჯდომარეს აარ დაუკონკრეტებია, მოიაზრებს თუ არა მათ შორის სახელმწიფო დეპარტამენტის პრესსპიკერ ნედ პრაისსა და  ევროკავშირის უმაღლეს წარმომადგენელს საგარეო საქმეთა და უსაფრთხოების პოლიტიკის საკითხებში ჯოზეფ ბორელს, რომლებმაც კანონპროექტთან დაკავშირებით მკაცრი განცხადებები გაავრცელეს.

„ამ ყველაფრიდან ჩანს რამდენად ყალბია ის კამპანიები, რომლებიც წარმოებს ამ კანონის გარშემო. არ მინდა არავინ დავაკონკრეტო, მაგრამ ვიღაცები არიან, ჩვენ ვსაუბრობთ ხშირად გლობალური ომის პარტიაზე და კონკრეტიკაში არ მინდა შევიდე. მაგრამ როდესაც ფინანსდება სირცხვილია, დროა, ნამახვანის დაბლოკვა, პივიტის გაყალბება და ასე შემდეგ, ჩვენ გვგონია, რომ ამ ყველაფრით დაინტერესებულია გლობალური ომის პარტია და პირდაპირაა ჩართული ამ კანონის წინააღმდეგ კამპანიაში, ვიღაცას არ უნდა რომ გამჟღავნდეს და ქართული საზოგადოებისთვის ცნობილი გახდეს თუ ვინ აფინანსებს საქართველოში ექსტრემისტულ ორგანიზაციებს, ენერგეტიკული დამოუკიდებლობის შეფერხებას და ასე შემდეგ,“ - განაცხადა ირაკლი კობახიძემ.

რაც შეეხება მოსალოდნელ სანქციებს, ირაკლი კობახიძე ამას აბსურდს უწოდებს:

„ეს სრული აბსურდია, ნურავინ ნუ იჩქარებს,“ - აცხადებს კობახიძე.