დღეს 15 აპრილს  საქართველოს მთავრობამ ევროკავშირის  კითხვარი  გამოაქვეყნა, რა  იქნება ის პრობლემური საკითხები, რომელზეც საქართველოს მთავრობას გაუჭირდება  პასუხის გაცემა, ამის შესახებ რადიო “კომერსანტის“ ეთერში საერთაშორისო პოლიტიკური ეკონომიკის ევროპული ცენტრის უფროსმა მკვლევარმა და საქართველოს  ყოფილი  პრეზიდენტის მრჩეველმა თენგიზ ფხალაძემ ისაუბრა. მისი თქმით ყველას ვალდებულებაა ის, რომ ევროკავშირს გაეგზავნოს რეალური და ობიექტური ინფორმაცია.

„აქ  არის კითხვების სამი ძირითადი ბლოკი, ეს არის პოლიტიკური კრიტერიუმები,  სახელმწიფო სისტემის მოწყობა და კონსტიტუცია თუ რამდენად  გამართულად მოქმედებენ და  მუშაობენ  სახელმწიფო ინსტიტუტები, რამდენად  არის კოორდინაცია,  ფუნქციების გამიჯვნა  და  ა.შ. აქედან ძალიან დიდი ნაწილი ეთმობა მართლმსაჯულების  სისტემას, თავისი  საკონსტიტუციო  სასამართლოთი, მის  დამოუკიდებლობას  და  ა.შ. 

მეორე დიდი ბლოკი  კითხვებისა ეს არის  უფლებები და  თავისუფლებები ყველა  თავისი პრობლემატიკით, დაწყებული,  ბავშვთა  უფლებები, ქალთა უფლებები  უმცირესობების უფლებები, კერძო საკუთრება და ყველაფერი.

მესამე საკითხი არის  ეკონომიკური პარამეტრები, ქვეყნის  ეკონომიკური  შესაძლებლობები და ის ეკონომიკური რეფორმები რომლებიც  მას აახლოებს  ევროკავშირთან და მას ევროპული ბაზრისთვის კონკურენტუნარიანს ხდის“, -  აღნიშნა თენგიზ ფხალაძემ. 

თენგიზ ფხალაძის თქმით არ იქნება სწორი იმის თქმა, რომ საქართველო რომელიმე ბლოკში წელგამართულია, თუმცა მისივე თქმით ამის ილუზია და მოლოდინი არც არავის აქვს. მან ასევე აღნიშნა, რომ კითხვარი არის რეალობის შეფასება იმისთვის, რომ ყველამ დაინახოს თუ სად არის ქვეყანა.

„აქ რამდენიმე მნიშვნელოვანი საკითხია, პირველ რიგში ეს არის კეთილგანწყობა,  რომელიც  არსებობს  ევროკავშირში საქართველოსთან, როგორც სამომავლო  კანდიდატთან დაკავშირებით,  ამას  სრული პასუხისმგებლობით  ვამბობ იმიტომ რომ ვიცი  შიდა  განწყობები და დამოკიდებულება არის უპირველეს ყოვლისა  მოტივირებული  იმ საერთაშორისო  პოლიტიკური  ვითარებით  შექმნილი,  რა მოცემულობაც  ომმა უკრაინაში შექმნა,  ამიტომ  თავისთავად ცხადია გათვალისწინებული იქნება  იმ პოლიტიკური სიგნალების აუცილებლობა, რომელიც რუსეთის წნეხის  ქვეშ მყოფ ქვეყნებს აქვთ. თავისთავად  ცხადია, რომ  დამოკიდებული იქნება იმაზე თუ რა წავა  აქედან, როგორ  მოხდება  ამ  კითხვარის შევსება. არ მთავარი ის კი არ არის რომ  ჩვენ  დავფაროთ  პრობლემა,  არამედ მთავარია ვაჩვენოთ  ჩვენი მზადყოფნა  იმასთან დაკავშირებით,  რომ  არსებული  პრობლემების მოგვარებისთვის მზად ვართ შინაგანად.

დღეს ის მნიშვნელოვანი მომენტია,  რომელზეც  ყველა  ვოცნებობდით, შესაძლებლობების  ფანჯარა გაიღო და  კიდევ  ერთხელ  ვამბობ, რომ ეს  ყველაფერი დააჩქარა ომმა  და  ამის  ხელიდან  გაშვება  იქნება  განუზომელი  ზიანი  ჩვენი ქვეყნის, სახელმწიფოებრიობისა და მომავლისთვის“, - აღნიშნა თენგიზ ფხალაძემ.

თენგიზ ფხალაძე კითხვების რაოდენობასაც გამოეხმაურა და განმარტა, რომ კითხვების რაოდენობა უპრეცედენტოდ ცოტაა და ეს  სულაც  არ ნიშნავს იმას რომ ისეთ სახელმწიფოდ აღვიქმებით რომელსაც ცოტა კითხვა უნდა დაუსვა, მისივე  თქმით შეიძლებოდა რომ კითხვები გაცილებით უფრო მწვავე ყოფილიყო, თუმცა ეს კეთილგანწყობიდან გამომდინარეობს.