როდის წაიკითხეთ საქართველოს კონსტიტუცია ბოლოს? იმიტომ, რომ თქვენი მთავრობა და მათ შორის პრემიერ-მინისტრი ფაქტობრივად, პერმანენტულად არღვევს საქართველოს კონსტიტუციას,-ასე მიმართა პარტია „საქართველოსთვის“ პოლიტსაბჭოს წევრმა, დეპუტატმა ანა ბუჩუკურმა პარლამენტის პლენარულ სხდომაზე უმრავლესობის წევრებს.

მისი თქმით, უხერხული და სირცხვილია, როდესაც „ქართული ოცნება“ სხვას მოუწოდებს კონსტიტუციის გადაკითხვას და თავად ამის საწინააღმდეგოს აკეთებს.

„არ შემიძლია არ გამოვეხმაურო იმ განცხადებას, რომელიც სხდომის დაწყებამდე რამდენიმე წუთით ადრე მმართველმა პარტიამ გაავრცელა და რომელიც ფაქტობრივად, ერთგვარი თავდასხმა იყო სახელმწიფო ინსტიტუტზე. ვგულისხმობ საქართველოს პრეზიდენტს. თქვენ საქართველოს პრეზიდენტს მოუწოდეთ, რომ კონსტიტუცია წაიკითხოს, დასდეთ ბრალი, რომ კონსტიტუციას არღვევს, თუმცა, თქვენთან ანალოგიური შეკითხვა მექნება- როდის წაიკითხეთ საქართველოს კონსტიტუცია ბოლოს? იმიტომ, რომ თქვენი მთავრობა და მათ შორის პრემიერ-მინისტრი ფაქტობრივად, პერმანენტულად არღვევს საქართველოს კონსტიტუციას. საქართველოს კონსტიტუციის მიხედვით, მას აქვს ვალდებულება, როდესაც პარლამენტის წევრი მიმართავს კითხვით, უნდა უპასუხოს და ამას არ აკეთებს. ეს კონსტიტუციის დარღვევა არ არის? მთავრობის წევრს, მათ შორის პრემიერ-მინისტრს აქვს ვალდებულება, როდესაც გარკვეული საპარლამენტო ჯგუფი მას პარლამენტში იბარებს, უნდა გამოცხადდეს კონსტიტუციისა და რეგლამენტის მიხედვით, ეს არის სავალდებულო. როდესაც ამას არ აკეთებთ, ეს კონსტიტუციის დარღვევა არ არის? უხერხული და სირცხვილია, როდესაც სხვას მოუწოდებთ კონსტიტუციის გადაკითხვას და თქვენ ამის საწინააღმდეგოს აკეთებთ“,-განაცხადა ბუჩუკურმა.

მან პრეზიდენტის გუშინდელი მოხსენება შეაფასა და აღნიშნა, რომ ის სამართლიანი იყო. ბუჩუკურის თქმით, სამწუხარო რეალობაა ის, რომ როგორც „ქართული ოცნების“, ასევე „ნაციონალური მოძრაობის“ მხრიდან რადიკალიზაციის ხარისხი იზრდება.

„გასაგებია, რომ „ქართულ ოცნებას“ და „ნაციონალურ მოძრაობას“ არ მოგეწონათ ის, რაც გუშინ საქართველოს პრეზიდენტის მხრიდან მოისმინეთ, მაგრამ იმის მიუხედავად, თქვენ მოგეწონათ თუ არ მოგეწონათ, ის, რაზეც პრეზიდენტმა ორივე პარტიასთან დაკავშირებით ისაუბრა, რეალობაა“,-განაცხადა ბუჩუკურმა.

წყარო: ipn.ge