„ჩემთვის აბსოლუტურად მიუღებელია ცილისწამება, მით უფრო საარჩევნო კამპანიის დროს ოპონენტების მიმართ ნარკოდამოკიდებულებაზე დაუსაბუთებლად აპელირება,“ - ასე გამოეხმაურა პარტია „ანა დოლიძე-ხალხისთვის“ ლიდერი, თბილისის მერობის კანდიდატი ანა დოლიძე „ქართული ოცნების“ თავმჯდომარის ირაკლი კობახიძის განცხადებებს ყოფილი პრემიერის გიორგი გახარიას ნარკოდამოკიდებულებასთან დაკავშირებით. ინფორმაციას პარტია „ანა დოლიძე-ხალხისთვის“ პრესსამსახური ავრცელებს.
ანა დოლიძე მზადყოფნას გამოთქვას სამართლებრივად მხარდაჭერა გამოუცხადოს გიორგი გახარიას, როგორც ქვეყნის შიგნით, ასევე საერთაშორისო ასპარეზზე. ამასთან დოლიძე მიმართავს სამართალდამცველ ორგანოებს დაჰკითხონ ირაკლი კობახიძე დანაშაულის დაფარვის გამო.
„როგორც იცით, მე თავად ვიყავი სასამართლო კლანის მიერ ცილისწამების მსხვერპლი. ჩემთვის აბსოლუტურად მიუღებელია ეს ქმედება ნებისმიერი ადამიანი მიმართ. მით უფრო, როდესაც საარჩევნო კამპანიის დროს ოპონენტისადმი ხდება ნარკოდამოკიდებულებაზე აპელირება. ეს ემსახურება მხოლოდ და მხოლოდ ამ სენის სტიგმატიზაციას. მიუხედავად იმისა, რომ ბევრ საკითხთთან დაკავშირებით მაქვს მკვეთრი წინააღმდეგობა გიორგი გახარიასთან, როგორც ამ საქმეში გამოცდილი საერთაშორისო დონის იურისტი, მზად ვარ მხარდაჭერა გამოვუცხადო მას, უტიფარ ირაკლი კობახიძის წინააღმდეგ. გახარიამ უნდა იბრძოლოს საკუთარი პატივის და ღირსების დასაცავად, როგორც საქართველოში, ასევე სტრასბურგის სასამართლოში. ეს გზა მე პირადად გავიარე გვრიტიშვილის ცილისწამებასთან მიმართებაში. ვფიქრობ, აუცილებელია პოლიტიკა იყოს დაფუძნებული არა მსგავს ლანძღვაზე და საოცარ ბრალდებებზე, არამედ საქმიან ურთიერთობაზე. ამასთან მოვუწოდებ პროკურატურას, დაკითხოს ირაკლი კობახიძე. როგორც იგი ამტკიცებს, მას ჰქონდა ინფორმაცია ყოფილი პრემიერის ნარკოდამოკიდებულებაზე და მან ეს დანაშაული დაუმალა სამართალდამცველ ორგანოებს,“ - განაცხადა ანა დოლიძემ.