„აგენტების“ შესახებ კანონპროექტი, რომელსაც საქართველოს საერთაშორისო პარტნიორები მკვეთრად უარყოფითად აფასებენ, გუშინ 76 დეპუტატის მხარდაჭერით პირველი მოსმენით იქნა მიღებული.  კანონპროექტს, როგორც ამერიკელი, ასევე ევროპელი პოლიტიკოსები საქართველოს ევროინტეგრაციის ხელისშემშლელ ფაქტორად მიიჩნევენ.

„ქართული ოცნება“ და მისი განაყოფი „ხალხის ძალა“, ხშირად აცხადებენ, რომ მათთვის პირველ ადგილზე საქართველოს ინტერესებია და მხოლოდ შემდეგაა დასავლელი პარტნიორების მოსაზრება, რომელსაც საქართველოს ინტერესების შესაბამისად ან გაითვალისწინებენ ან არა.

ნამდვილად ასე ნაკლებად მნიშვნელოვანია თუ არა მმართველი პარტიის წევრებისთვის დასავლეთი? როგორც აღმოჩნდა საკუთარი შვილების მომავალს ისინი სწორედ დასავლეთში გეგმავენ. „აგენტების რუსული კანონის“ მხარდამჭერ მინიმუმ 7 დეპუტატს შვილები სწორედ აშშ-ის ან ევროპის ქვეყნებში ჰყავს შეძენილი და მათი ნაწილი ან ამ ქვეყნების მოქალაქეა, ან როგორც იქ დაბადებული გარკვეული პრივილეგიებით სარგებლობს ან ისარგებლებს მომავალში.

„ქართული ოცნების“ დეპუტატის, ალუდა ღუდუშაურის ორივე შვილი აშშ-ში, ნიუ-იორკში დაიბადა 2015 და 2017 წლებში.

აშშ-ი, კერძოდ ილინოისშია დაბადებული ბექა ოდიშარია შვილიც 2012  წელს.

2009 წელს ნიუ იორკშია დაბადებული „ქართული ოცნების ფრაქციის“ თავმჯდომარის მოადგილის, ირაკლი ჩიქოვანის შვილიც.

ინგლისში მანჩესტერშია დაბადებული მიხეილ ყაველაშვილის შვილი 1996 წელს.  2001 წელს კი მეორე შვილი შვეიცარიაში ციურიხში დაიბადა.

ანრი ოხანაშვილის ორივე შვილი გერმანიაში, ბერლინშია დაბადებული – 2013 და 2015 წლებში.

„ქართული ოცნების“ კიდევ ერთი წევრის, დავით სონღულაშვილის ერთ-ერთი შვილი კი საფრანგეთში, გრენობლშია  დაბადებული.

ლევან კობიაშვილის შვილები 1999 და 2007 წლებში გერმანიაში ფრაინბურგსა და დუისბურგში დაიბადნენ