ნაღმი, რომელიც ბათუმის სანაპიროზე აფეთქდა მაღალი ალბათობით უკრაინიდან არ მოსულა და არ არის გამორიცხული დივერსიასთან გვქონდეს საქმე. აღნიშნულის შესახებ გარემოს დაცვის ექსპერტი არჩილ გუჩმანიძე სოციალურ ქსელში წერს.

გუჩმანიძის განმარტებით, გაგვიმართლა, რომ დიდი შტორმი იყო და ამ დროს აღნიშნულ აკვატორიაში არცერთი გემი არ მოძრაობდა.

„1. ეს ნაღმი მაღალი ალბათობით არ მოსულა უკრაინიდან, შავი ზღვაში გვაქვს ორი ციკლური დინება, ერთი მის აღმოსავლეთ, ხოლო მეორე მის დასავლეთ ნახევარში, ეს ორი წყლის მასების წრებრუნვა ერთმანეთისგან გამიჯნულია (მას ოკეანოგრაფები კნიპოვიჩის სათვალეს ეძახიან). უკრაინიდან წყლის მასებს, რომ წამოეღო ეს ნაღმი, მას უნდა გამოიარა დუნაის ფრონტი, რუმინეთის (200 კილომეტრია), ბულგარეთის (300 კილომეტრია) სანაპირო და მერე უნდა გადასულიყო თურქეთის წყლებში, სადაც მას მოუწევდა ბოსფორის სრუტის სიახლოვეს (სადაც გემების დიდი ტრაფიკია) მოხვევა, მერე მას უნდა ემოძრავა სინოპის ნახევარკუნძულამდე (კიდევ 500 კილომეტრი) სადაც უნდა გადაელახა ორი ციკლურ დინებას შორის არსებული სივრცე (ეს დრეიფით ფაქტობრივად შეუძლებელია) და გადმოსულიყო შავი ზღვის აღმოსავლეთ ნახევარში, სადაც მას თურქეთის ნაპირების გასწვრივ კიდევ უნდა დაეძლია 600 კილომეტრი და მოეღწია საქართველოს წყლებამდე. მაღალი ალბათობით საქმე სხვა რამესთან გვაქვს (არაა გამორიცხული დივერსია).

2. გაგვიმართლა, იქვე 100 მეტრშია ზღვაში შეჭრილ პირსზე მოწყობილი რესტორანი სანრემო, ნაღმის ამ კონსტრუქციას რომ დასჯახებოდა და მომხდარიყო დეტონაცია საუბედუროდ გვექნებოდა მსხვერპლი;

3. გაგვიმართლა, რომ დიდი შტორმი იყო და ამ დროს აღნიშნულ აკვატორიაში არცერთი გემი არ მოძრაობდა, ალბათობა გემთან შეჯახების (ნაღმი აუცილებლად ჩრდილოეთით ბათუმის პორტისკენ წაიწევდა) ძალზედ მაღალი იყო - თანმდევი ტრაგედიებით.

4. როგორც თვითმხილველები ამბობენ იქ კიდევ იყო მეორე ნაღმი, რომელიც იქ არ აფეთქებულა - ზღვამ წაიღო“, წერს გუჩმანიძე სოციალურ ქსელში.