თელავის მუნიციპალიტეტის მერმა ლევან ანდრიაშვილმა თელავის მუნიციპალიტეტის 28-ვე სოფლის მოსახლეობას 2022 წლის განმავლობაში განხორციელებული პროექტები წარმოუდგინა. შეხვედრაზე მერმა განაცხადა, რომ იმ უპასუხისმგებლო შემსრულებლებს, ვინც სახელმწიფო დაკვეთით სამუშაოებს ასრულებენ, გულგრილობა არ გაუვათ. არაერთი კომპანია მოხვდა შესყიდვების „შავ სიაში და ეს სია კიდევ გაიზრდება.
„სრული პასუხისმგებლობით ვაცხადებ ! – იმ უპასუხისმგებლო შემსრულებლებს, ვინც სახელმწიფო დაკვეთით ასრულებენ სამუშაოებს, ვპირდები, არ გაუვათ გულგრილობა დაკისრებული ვალდებულებების მიმართ, ყველას კანონის ფარგლებში უმკაცრესად მოეთხოვება პასუხი! არაერთი კომპანია მოხვდა შესყიდვების „შავ სიაში და პირობას ვდებ მომავალში თუ მსგავსი შემთხვევები განმეორდა ეს სიაც და საჯარიმო სანქციებიც კიდევ უფრო გაიზრდება!“, - განაცხადა მერმა.
თელავის მერიის ინფორმაციით, მუნიციპალიტეტის ბიუჯეტი 2022 წელის დასაწყისში 28 302 000 ლარს შეადგენდა, განხორციელებული ცვლილებების და მათ შორის სახელმწიფო ბიუჯეტიდან გამოყოფილი თანხების ასახვით კი ბიუჯეტი საბოლოოდ განისაზღვრა 79 513 820 ლარით.
როგორც ლევან ანდრიაშვილმა აღნიშნა, მერიის საქმიანობის პრიორიტეტი ინფრასტრუქტურული პროექტებია, თუმცა ამავე დროს გასულ წელთან შედარებით გაზრდილია სოციალური დახმარებების ბიუჯეტიც.
მერის განცხადებით, წელს პირველად თელავის მუნიციპალიტეტმა დაიწყო ევროკავშირის დაფინანსებით გათვალისწინებული პროექტების განხორციელება -„სწორედ ამ პროგრამით დაიწყო ისეთი მნიშვნელოვანი პროექტები როგორიცაა ახალი მშვიდობის სკვერის მშენებლობა, თელავის კორტების და ნადიკვარის რეაბილიტაცია, ახალი რეკრეაციული სივრცე ჩოხელისა და ბახტრიონის ქუჩებს შორის, ახალი ფეხბურთის მოედანი და სხვა“.
ლევან ანდრიაშვილის განცხადებით, სწორედ ინფრასტრუქტურული პროექტები უწყობს ხელს მუნიციპალიტეტის განვითარებას, რაც საბოლოოდ თითოეული მოქალაქის კეთილდღეობაზე აისახება.