საქართველოს პრემიერ-მინისტრი ირაკლი ღარიბაშვილი ევროპარლამენტარების დელეგაციას შეხვდა. ევროპარლამენტის სხვადასხვა პოლიტიკური ჯგუფის წარმომადგენლებს არჩევნების დემოკრატიულ, გამჭვირვალე გარემოში ჩატარების კუთხით გადადგმულ ნაბიჯებსა და საქართველოს ევროპული ინტეგრაციის გზაზე ესაუბრა. დელეგაციის შემადგენლობაში იმყოფებიან  ევროპის სახალხო პარტიისა და სოციალისტებისა და დემოკრატების პროგრესული ალიანსის წევრი დეპუტატები, ტომას ზდეჩოვსკი, ვიქტორ ნეგრესკუ და კორინა კრეტუ.

"იმედი მაქვს, რომ ამ უქმეებზე კიდევ ერთი ნაბიჯი გადაიდგმება მშვიდობის, სტაბილურობისა და ეკონომიკური ზრდისკენ", -  ამის შესახებ ევროპარლამენტის სოციალისტებისა და დემოკრატების პროგრესული ალიანსის ჯგუფის დეპუტატმა კორინა კრეტუმ, საქართველოს პრემიერ-მინისტრ ირაკლი ღარიბაშვილთან შეხვედრის შემდეგ განაცხადა. მისი თქმით, ევროპარლამენტარებისთვის მნიშვნელოვანია დარწმუნდნენ, რომ აღმოსავლეთ პარტნიორობის ქვეყნებში მოქალაქეები უკეთესად ცხოვრობენ, რომ დემოკრატიული სტანდარტებით უწევთ მუშაობა.

„ძალიან მიხარია, რომ კვლავ ვიმყოფები საქართველოში. უკვე 30 წელი გავიდა მას შემდეგ, რაც 1993 წელს ვიმყოფებოდი აქ პირველად.  ქვეყნის დემოკრატიული განვითარების გზას ევროკავშირიდან ვაკვირდებოდი. იმედი მაქვს, რომ ამ უქმეებზე კიდევ ერთი ნაბიჯი გადაიდგმება მშვიდობის, სტაბილურობისა და ეკონომიკური ზრდისკენ. კარგად მოგეხსენებათ, რომ ევროკავშირი დიდ კაპიტალდაბანდებას ახორციელებს საქართველოში. ჩვენთვის, ევროპარლამენტარებისთვის, მნიშვნელოვანია დავრწმუნდეთ, რომ აღმოსავლეთ პარტნიორობის ქვეყნებში მოქალაქეები უკეთესად ცხოვრობენ", -  აღნიშნა კორინა კრეტუმ.

ტომას ზდეჩოვსკიმ ხაზი გაუსვა, რომ  ევროკავშირი დაინტერესებულია საქართველოსთან მეგობრული ურთიერთობის შენარჩუნებით.

„დღეს განვიხილეთ ჩვენი ურთიერთობის მომავალი. ამჟამად ის ძალიან კარგ ნიშნულზეა.
მე თავად ჩეხეთიდან ვარ და საქართველოში ინვესტიციების მიხედვით მესამე ადგილზეა ჩემი ქვეყანა. იმედი გვაქვს, რომ მომავალშიც სტაბილური და პროაქტიული პარტნიორი იქნება საქართველო ჩეხეთთან, ევროკავშირთან და ჩრდილოატლანტიკური ალიანსის ქვეყნებთან მიმართებით", -  აღნიშნა ტომას ზდეჩოვსკიმ.

ვიქტორ ნეგრესკუს შეფასებით, ევროპარლამენტარები აქ იმყოფებიან ევროპული ფასეულობების მხარდასაჭერად, ღია და სამართლიანი არჩევნებისთვის, სიტუაციაზე დასაკვირვებლად და ქართველი ხალხის  მოსაზრებების გასაგებად.

"ევროპარლამენტიდან ჩამოვედით იმის სათქმელად, რომ საქართველო სულ უფრო ახლოს უნდა იყოს ევროკავშირთან. ჩვენ სხვადასხვა ქვეყნებიდან ვართ წარმოშობით. მე თავად რუმინეთიდან გახლავართ. ჩვენ საქართველოსთან ძლიერი ორმხრივი ურთიერთობა გაგვაჩნია სხვადასხვა მიმართულებით, ერთ-ერთია უსაფრთხოების სფერო. ჩვენ მიგვაჩნია, რომ ძლიერი დემოკრატია ძლიერ განვითარებას მოასწავებს. ასევე მიგვაჩნია, რომ ძლიერი პარტნიორობით, ევროკავშირთან, მის წევრ სახელმწიფოებთან, ჩრდილოატლანტიკურ ალიანსთან და სხვა პარტნიორებთან საქართველოში შეიძლება ცხოვრება აყვავდეს.
იმედი მაქვს, რომ დღევანდელი შეხვედრა და საუბარი კონსტრუქციული იყო და გავაგრძელებთ ქართველ ხალხთან კონსტრუქციული ურთიერთობის ქონას", -  განაცხადა ვიქტორ ნეგრესკუმ.