„ნაციონალურმა მოძრაობამაც“ მიიღო გადაწყვეტილება, რომ წავიდნენ „მარცხჯვნივ“, რადგან თან უნდათ პარლამენტში ყოფნა და თან არ სურთ შეთანხმებაზე ხელის მოწერა, - ასე ეხმაურება პარლამენტის ვიცე-სპიკერი არჩილ თალაკვაძე „ნაციონალური მოძრაობის“ გადაწყვეტილებას საკანონმდებლო ორგანოში შესვლასთან დაკავშირებით.

როგორც თალაკვაძე ამბობს, „ნაციონალური მოძრაობა“ 7 თვის განმავლობაში მხოლოდ იმით იყო დაკავებული, რომ როგორმე დაებლოკა ქვეყნის დემოკრატიული პროცესი.

„7-თვიანი ფიქრის და მსჯელობის შემდეგ როგორც ხედავთ „ნაციონალურმა მოძრაობამაც“ მიიღო გადაწყვეტილება, რომ წავიდნენ „მარცხჯვნივ“, რადგან თან უნდათ პარლამენტში ყოფნა და თან არ სურთ შეთანხმებაზე ხელის მოწერა. მესმის ეს რითიც არის განპირობებული, მათ მოატყუეს საზოგადოება და განსაკუთრებით საკუთარი მხარდამჭერები. უთხრეს, რომ ერთადერთი, რაც ამ ქვეყანას სჭირდება არის დესტაბილიზაცია, არჩევნებისთვის ძირის გამოთხრა, საბოტაჟი, ხელოვნური კრიზისი და 7 თვის შემდეგ საზოგადოებამ აღმოაჩინა, რომ ის, რასაც „ნაციონალური მოძრაობა“ სთავაზობდა ქვეყანას იყო ზუსტად ანტისახელმწიფოებრივი. ეს გახლავთ ანტისისტემური პარტია, რომელიც მხოლოდ იმით იყო დაკავებული ამ თვეების განმავლობაში, რომ როგორმე დაებლოკა ჩვენი ქვეყნის დემოკრატიული პროცესი. ამით მათ ხელი შეუშალეს ქვეყნის განვითარებას, დააკარგინეს სახელმწიფოს დრო და ენერგია, თუმცა, კარგია, რომ ეს ხელოვნური კრიზისი დასრულებულია. ახლა პარლამენტში დაინახავენ რას ნიშნავს ოპოზიციაში ყველაზე უკანა ადგილას ყოფნა იმიტომ, რომ ისინი ყველაზე ბოლოები შემოვიდნენ პარლამენტში“, - განაცხადა თალაკვაძემ.

IPN.GE