ჰააგის სასამართლოს პროკურორის მიერ ცხინვალის დე-ფაქტო ხელისუფლების ჩინოსანთა მიმართ დაკავების ორდერების გამოცემა ნიშნავს, რომ ამ საქმეზე სამართალი აღსრულდება და მოვიდა დრო, როცა დამნაშავეები პასუხისგებაში მიეცემიან, - ამის შესახებ პარლამენტის ვიცე-სპიკერმა არჩილ თალაკვაძემ განაცხადა.
მისი თქმით, ევროსასამართლოში რუსეთის წინააღმდეგ საქმის მოგების შემდეგ, ეს არის უკვე მეორე საერთაშორისო ინსტანცია, სადაც საქართველოს ხელისუფლებამ შეძლო მტკიცებულებებისა და არგუმენტების წარმატებით წარდგენა.
„მნიშვნელოვანი სიახლეა, რომ სისხლის სამართლის საერთაშორისო სასამართლოს პროკურორმა გამოსცა დაკავების ორდერები ოკუპირებული ცხინვალის დე-ფაქტო ხელისუფლების იმ ჩინოსანთა მიმართ, რომელთაც პროკურორის მტკიცებით, 2008 წლის ომის დროს მძიმე დანაშაულები ჩაიდინეს და ადამიანების კონვენციური უფლებები დაარღვიეს. ეს ეხება წამებას, არაადამიანურ მოპყრობას, ეთნიკურად ქართველი მოსახლეობის და სამოქალაქო პირების ტყვედ აყვანას, მათ მიმართ უღირს, არაადამიანურ მოპყრობას და მათი უფლებების ხელყოფას. სამ ასეთ პირთან მიმართებით გამოიცა პატიმრობის ორდერები, რაც ნიშნავს იმას, რომ ამ საქმეზე სამართალი აღსრულდება და მოვიდა ის დრო, როცა დამნაშავეები პასუხისგებაში მიეცემიან. ევროსასამართლოში რუსეთის წინააღმდეგ საქმის მოგების შემდეგ, ეს არის უკვე მეორე საერთაშორისო ინსტანცია, სადაც საქართველოს ხელისუფლებამ შეძლო მტკიცებულებებისა და არგუმენტების წარმატებით წარდგენა და თავისი სიმართლის დამტკიცებისთვის ქმედითი ნაბიჯების გადადგმა. ამიტომ მინდა მთავრობას და იუსტიციის სამინისტროს, იმ იურისტებს, ვინც საქართველოს უფლებების დასაცავად იყვნენ ჩართულნი და ყველა ადამიანს, ვინც მტკიცებულებების შეგროვებასა და გაგზავნაში მონაწილეობდნენ, განსაკუთრებული მადლობა გადავუხადო,“ - განაცხადა თალაკვაძემ.
ცნობისთვის, ჰააგის სასამართლოს პროკურორის მიერ აგვისტოს ომის საქმეზე ცხინვალის დე-ფაქტო ხელისუფლების სამი ჩინოსნის დაკავების ორდერი გამოიცა.
ipn.ge
არჩილ თალაკვაძე
