აშშ-ის მიერ სანქცირებული მოსამართლეების ოთხეულიდან ერთ-ერთს ვალერიან ცერცვაძის ერთ-ერთი შვილი ამერიკაში, ნიუ იორკშია დაბადებული 2013 წელს. ამის შესახებ ცნობილი ხდება მის მიერ შევსებული დეკლარაციიდან.
ყოფილი მოსამართლე, ვალერიან ცერცვაძე, რომელიც აშშ-ს მიერ სანქცირებულთა სიაში მოხვდა, მის წინააღმდეგ ბრალდებებს არ ეთანხმება და აცხადებს რომ სახელმწიფო დეპარტამენტმა გადაწყვეტილება დაუსაბუთებელი ინფორმაციის საფუძველზე მიიღო. ამის შესახებ ის ფეისბუქზე წერს.
მინდა ავღნიშნო, რომ 6 წელია რაც აღარ ვარ არც სასამართლო და არცერთ სხვა სახელმწიფო თანამდებობაზე, შესაბამისად ჩემი, როგორც უვადო მოსამართლედ მოხსენიება აშკარად წარმოადგენს ფაქტების შეგნებულ დამახინჯებას. აღნიშნული პირდაპირ მიუთითებს იმაზე, რომ აბსოლუტურად მცდარი და დაუსაბუთებელი ინფორმაციის საფუძველზე იქნა მიღებული ეს გადაწყვეტილება.
ცალსახად მინდა განვაცხადო, რომ არ არსებობს არცერთი ფაქტი და მტკიცებულება, რომელიც დაადასტურებს გაჟღერებულ ბრალდებებს. მიმაჩნია, რომ ყოველგავარი დასაბუთების გარეშე და უდანაშაულობის პრეზუმფციის დარღვევით გაკეთებული განცხადებები, ატარებს პოლიტიკურ შინაარსს.
ძალიან სამწუხაროა, მაგრამ ვფიქრობ, რომ აღნიშნული მიზნად ისახავს სასამართლოში გავლენის მოპოვებას და მის სრულ დისკრედიტაციას, - წერს ვალერიან ცერცვაძე.
თბილისის სააპელაციო სასამართლოს ყოფილი თავმჯდომარე ვალერიან ცერცვაძე დასანქცირებული ოთხი ადამიანიდან ერთადერთია, რომელიც ამჟამად მოსამართლის თანამდებობას აღარ იკავებს. ის სასამართლოში მაღალ თანამდებობას იკავებდა ნაციონალური მოძრაობის ხელისუფლების დროსაც.
როგორც სანქცირებასთან დაკავშირებით ამერიკის საელჩოს მიერ გამოქვეყნებულ განმარტებებშია ნათქვამი, სანქცირებულ პირებს და მათი უშუალო ოჯახის წევრებს აეკრძალათ ამერიკის შეერთებულ შტატებში შესვლა.
სანქცირების მიზეზად კი დასახელდა ის, რომ „სახელმწიფო მდივანს აქვს სანდო ინფორმაცია, რომ სანქცირებული პირები ჩართული იყვნენ მნიშვნელოვან კორუფციულ საქმიანობაში სასამართლოში მათი მოქმედი თუ წინა თანამდებობებზე ყოფნის პერიოდში. მათი კორუფციული ქმედებებით ისინი აზიანებდნენ სამართლის უზენაესობასა და დემოკრატიულ პროცესებს.“