რუსეთის  სახელმწიფო დუმის დეპუტატი სერგეი გავრილოვი რუსულ მედიასთან აცხადებს, რომ აუცილებელია საქართველოსთან აღდგეს არა მხოლოდ საჰაერო მიმოსვლა, არამედ სრულფასოვანი დიპლომატიური ურთიერთობაც. მისი თქმით, საელჩოსა და საკონსულო სამსახურის არსებობა ხელს შეუწყობს კონტაქტების გაფართოებას და შესაძლებლობებს ამ ქვეყანაში რუსების მხარდაჭერის უზრუნველსაყოფად.

უკრაინის საკითხზე საქართველოს დამოუკიდებელი პოზიციისა და რუსეთის წინააღმდეგ გაჩაღებული სანქციების ომის მიმართ მისი დამოკიდებულების გათვალისწინებით, აუცილებელია აღდგეს არა მხოლოდ საჰაერო მიმოსვლა, არამედ ჩვენს ქვეყნებს შორის სრულფასოვანი დიპლომატიური ურთიერთობები. საელჩოსა და საკონსულო სამსახურის არსებობა ხელს შეუწყობს ჩვენი კონტაქტების გაფართოებას და  საქართველოში ჩვენი მოქალაქეებისთვის მხარდაჭერის შესაძლებლობას, - განაცხადა გავრილოვმა.

მისი თქმით, ურთიერთობების აღდგენა ხელს შეუწყობს ვაჭრობის გაზრდას და ტურიზმის განვითარებას.

„უნდა გაიზარდოს ავიაკომპანიების რაოდენობა, მათ შორის მეგობარი ქვეყნებიდან, რომლებიც განახორციელებენ გადაზიდვებს რუსეთსა და საქართველოს შორის“, -  აღნიშნა დეპუტატმა.

მანამდე რუსეთის საგარეო საქმეთა მინისტრმა სერგეი ლავროვმა განაცხადა, რომ იმედოვნებს საქართველოსთან პირდაპირი ფრენები მალე აღდგება. მისი თქმით, საქართველოსთან კონტაქტები აქტიურად ვითარდება და 2022 წელს საქართველოს მშპ-ის 10%-ით გაზრდა, დიდწილად ტურიზმისა და რუსეთის ფედერაციასთან ურთიერთობის დამსახურებაა. 

მმართველი პარტია „ქართული ოცნების“ თავმჯდომარე ირაკლი კობახიძე აცხადებს, რომ მიესალმება რუსეთთან პირდაპირი ფრენების აღდგენას.

შეგახსენებთ, სწორედ სერგეი გავრილოვის სახელს უკავშირდება 2019 წლის 20-21 ივნისის მოვლენები, რომელიც „გავრილოვის ღამის“ სახელითაა შესული უახლეს ისტორიაში. თბილისში მართლმადიდებლობის საპარლამენტთაშორისო ასამბლეის სესიის დროს რუსეთის დუმის დეპუტატის სერგეი გავრილოვის მიერ საქართველოს პარლამენტის თავმჯდომარის, ირაკლი კობახიძის სკამის დაკავებას და საქართველოს პარლამენტში რუსულ ენაზე ასამბლეის სესიის ჩატარებას თბილისში მასშტაბური ანტისაოკუპაციო საპროტესტო აქცია მოჰყვა, რომელიც გვიან ღამით სამართალდამცველებმა დაშალეს  ადგილობირივი და საერთაშორისო არასამთავრობო ორგანიზაციების მოსაზრებით, სამოქალაქო პროტესტის წინააღმდეგ იყო გამოყენებული არაპროპორციული საპოლიციო ძალა.  დაშავებულებიდან ორმა თვალი დაკარგა, დაზიანებები მიიღო რამდენიმე ათეულმა ადამიანმა, მათ შორის მედიის წარმომადგენლებმა.

საქართველო რუსეთს შორის ფრენების შეწყვეტაც სწორედ სერგეი გავრილოვის ინციდენტთანაა დაკავშირებული. რუსეთმა საქართველოსთან ფრენები 2019 წლის 8 ივლისს შეწყვიტა, რუსეთის პრეზიდენტის ბრძანებულებით, რუსულ ავიაკომპანიებს დროებით ეკრძალებათ საქართველოში საჰაერო გადაზიდვების განხორციელება. რუსეთის ფედერაციის ტრანსპორტის სამინისტრომ, თავის მხრივ, მიიღო გადაწყვეტილება ქართული ავიახაზების ფრენების შეჩერების შესახებ. რაც შეეხება დიპლომატიურ ურთიერთობას, საქართველომ რუსეთთან დიპლომატიური ურთიერთობა 2008 წლის 3 სექტემბერს თვითგამოცხადებული რესპუბლიკების - აფხაზეთისა და სამხრეთ ოსეთის დამოუკიდებლობის აღიარების საპასუხოდ გაწყვიტა.