ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა „ინტერპრესნიუსთან“ ექსკლუზიურ ინტერვიუში განაცხადა, რომ 2023 წლის განმავლობაში 50-მდე საკურორტო ადგილზე სახელმწიფო ქონების პრივატიზება მოხდება, პრივატიზების პროცესი მარტის თვიდან დაიწყება.

ვიცე-პრემიერის თქმით მთავრობა, ახალი ტურისტული ლოკაციების განვითარების პროგრამის ფარგლებში, ახალი ტურისტული ლოკაციების შექმნას ფიქრობს. მათ შორისაა - რაჭასა და ქვემო სვანეთში - ჭუთხარო, რომელიც სამთო-სათხილამურო მიმართულებით შეიძლება წამყვანი კურორტი გახდეს. ამისათვის მას რამდენიმე ასეული მილიონი ლარისა თუ დოლარის ინვესტიცია დასჭირდება. ამ სიაშია ასევე: ბალნეოლოგიური კურორტი ურაველი, კახეთში ზეკარი და ქვემო ქართლში - სამშვილდე.

„ჩვენ წინასწარი კვლევები გვაქვს გაკეთებული. ეს არის რაჭასა და ქვემო სვანეთში ახალი ლოკაცია ჭუთხარო, ეს არის პოტენციური კურორტი, რომელიც შეიძლება იყოს წამყვანი კურორტი სამთო-სათხილამურო მიმართულებით. მას რამდენიმე ასეული მილიონი ლარისა თუ დოლარის ინვესტიცია დასჭირდება. კურორტების ჩამონათვალში გვაქვს ჭუთხარო, რომელიც იქნება შეთავაზებული სხვადასხვა მნიშვნელოვანი მსხვილი საინვესტიციო ჯგუფისთვის. ასევე, ურაველია ამ სიაში, რომელიც ბალნეოლოგიური კურორტი იყო და აღდგენა შეიძლება. ჩვენი სია ძალიან დიდია. ზეკარი ასეთივე კურორტია, რომელიც ახალია და დიდი პოტენციალი გააჩნია კახეთის რეგიონში. სამშვილდე, რომელიც მნიშვნელოვანი ისტორიული დატვირთვისაა. სახელმწიფოს მნიშვნელოვანი ამოცანა იქნება იქ მისასვლელი გზა და ინფრასტრუქტურა მოაწყოს და შესაბამისი გარემო შექმნას, რომ ინვესტორებისთვის იყოს მიმზიდველი. ამ სიაში ბევრია არსებული, ცნობილი და დავიწყებული, ყოფილი კურორტი, ზოგი არის ნაკლებად ცნობილი და მნიშვნელოვანი პოტენციალის მატარებელი

რაც შეეხება წყალტუბოს, ვიცე-პრემიერმა განაცხადა, რომ ინვესტორები კურორტით ინტერესდებიან. მსხვილი უცხოური საინვესტიციო ჯგუფი 5 სანატორიუმს განავითარებს, დარჩენილ შვიდ სანატორიუმზეც მოლაპარაკება მიდის.

„ჩვენ არაერთი შეხვედრა გვქონდა კონკრეტულ ინვესტორებთან, ბიზნესებთან და ვნახეთ, რომ ინვესტორები ნამდვილად ინტერესდებოდნენ. მნიშვნელოვანი იყო, რომ მათ დაენახათ კონკრეტული აქტივობა, მათ შორის სახელმწიფოს მხრიდან. თქვენ იცით, რომ დღეის მდგომარეობით, უკვე 7 კურორტის რეალიზაცია განვახორციელეთ. მსხვილი უცხოური საინვესტიციო ჯგუფი განავითარებს 5 სანატორიუმს. დარჩენილ შვიდ სანატორიუმზეც მიდის მოლაპარაკება. ის, რომ არ ინტერესდებიან, არ არის მართებული. 2023 წელს ჩვენ ყველა ობიექტის რეალიზება გვექნება დასრულებული. ვფიქრობ, რომ ეს ინტერესი მნიშვნელოვნად გაიზრდება მას შედეგ, რაც სახელმწიფო დაანონსებულ სამუშაოებს განახორციელებს. 200 მილიონი, რაზეც ჩვენც ვისაუბრეთ, ზუსტად სახელმწიფოს იმ დარჩენილი ნაწილის სარეაბილიტაციოდ იქნება განსაზღვრული. წარმოიდგინეთ, კურორტს თუ არ აქვს მოწესრიგებული ინფრასტრუქტურა, მათ შორის ვიზუალი, იერსახე, არსებული შენობების რეაბილიტაცია არ ხდება, ინვესტორისთვის, ბუნებრივია, რთულად გადასადგმელია ნაბიჯები, რომ ჩადოს თანხები. როდესაც ჩვენ ამ ყველაფერს გავაკეთებთ სინქრონში, სახელმწიფო დახარჯავს თანხებს და მოაწესრიგებს იერსახეს, ეს, რა თქმა უნდა, გაზრდის მიზიდულობასა და კიდევ უფრო მეტად გაიზრდება ინტერესი ინვესტორების მხრიდან“, — განაცხადა ლევან დავითაშვილმა.