2022 წელს, სხვადასხვა პროგრამის ფარგლებში, ახალი საცხოვრებელი, მთელი ქვეყნის მასშტაბით, ჯამში, 3 530 დევნილ ოჯახს გადაეცა. 2023 წლიდან კი, მასშტაბური სამშენებლო სამუშაოები 5 ქალაქში - თბილისში, ზუგდიდში, ქუთაისში, რუსთავსა და ბორჯომში დაიწყება. ამის შესახებ დევნილთა, ეკომიგრანტთა და საარსებო წყაროებით უზრუნველყოფის სააგენტოს 2022 წლის საქმიანობის შემაჯამელ ღონისძიებაზე ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე ილია ღუდუშაურმა განაცხადა.
იძულებით გადაადგილებული ოჯახების განსახლებისა და საარსებო წყაროებით უზრუნველყოფის მიმართულებით შესრულებული სამუშაოები, ღონისძიებაზე, დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორმა ირაკლი მხეიძემ წარადგინა. მისი განცხადებით, 2022 წელს, პროგრამა „სოფლად სახლის" ფარგლებში, 2 588 ოჯახს საცხოვრებელი სახლი გადაეცა.
დასაქმებისა და შემოსავლის წყაროს გაჩენის მიზნით კი, სააგენტომ, იძულებით გადაადგილებული 500-ზე მეტი პირი დააფინანსა.
რაც შეეხება სამომავლო გეგმებს, ირაკლი მხეიძის თქმით, მომდევნო 3-4 წლის განმავლობაში, ახალი საცხოვრებელი ფართით იძულებით გადაადგილებული 13 000 ოჯახი დაკმაყოფილდება - ახალაშენებულ კორპუსებში ბინა 7000 ოჯახს გადაეცემა, „სოფლად სახლის“ პროგრამის ფარგლებში კი 6000 დევნილი ოჯახი განსახლდება, რის შედეგადაც მძიმე პირობებში არც ერთი დევნილი ოჯახი აღარ იცხოვრებს.