შეიძლება ყირიმის ხიდის აფეთქების უკან თვითონ პუტინი და რუსეთის სპეცსამსახურები იყოს, - ამის შესახებ „დროას“ ერთ-ერთმა ლიდერმა ბათუ ქუთელიამ „პალიტრანიუსის“ გადაცემა „თავისუფალი სტუდიაში“ განაცხადა.

როგორც ქუთელიამ აღნიშნა, პუტინს ამით ბრძოლის ველზე სამხედრო მარცხიდან სხვა კომპონენტზე ფოკუსისა და მთავარი აქცენტის გადაეტანა სურდა.

„მე ჩემი პოზიცია მაქვს და ვიხრები უფრო იმისკენ, რომ შეიძლება ამის უკან დიდი ალბათობით იყოს თვითონ პუტინი და რუსეთის სპეცსამსახურები. როგორც გვახსოვს პუტინი ხელისუფლებაში მოვიდა და ხელისუფლების კონსოლიდაცია დაიწყო საცხოვრებელი კორპუსების აფეთქებით იმისთვის, რომ მერე ტერორიზმში ბრალი დაედო ჩეჩნებისთვის, რომლებიც თავისუფლებისთვის იბრძოდნენ. შემდეგ ისინი მონათლა ტერორისტებად და დაიწყო სისხლიანი ჩახშობა ამ თავისუფლებისთვის ბრძოლის პროცესის ჩეჩნეთში. ჩემი ვარაუდით, ალბათ, ისევ ის სახელმძღვანელო გადმოიღო იმისთვის, რომ ბრძოლის ველზე სამხედრო მარცხიდან გადაეტანა ფოკუსი და მთავარი აქცენტი სხვა კომპონენტზე. შესაბამისად, სწრაფად დაგეგმილი, საპასუხო, მასირებული სარაკეტო დარტყმაც მთელ უკრაინაზე მე არ მგონია, რომ ხიდის თითქოსდა მოულოდნელ აფეთქებაზე იყო საპასუხოდ, არამედ, კარგად დაგეგმილი სერიების ნაწილია“, - განაცხადა ქუთელიამ.

რაც შეეხება იმას, რატომ დასჭირდათ ამ ყველაფერში საქართველოს ხსენება, ქუთელია ამბობს, რომ „ეს სპეცსამსახურების შესრულებული უნიჭო დრამატურგიაა“, რასაც სპეკულაციური ახსნები შეიძლება მოეძებნოს.

შეგახსენებთ, რომ რუსული მედიის ინფორმაციით, ყირიმის ხიდზე განხორციელებული ტერაქტის ფაქტზე აღძრული სისხლის სამართლის საქმესთან დაკავშირებით 8 ადამიანია დაკავებული, მათგან ხუთი რუსეთის, სამი კი - უკრაინისა და სომხეთის მოქალაქეა. ინფორმაციას რუსული მედია რუსეთის ფედერაციის უშიშროების ფედერალურ სამსახურზე დაყრდნობით ავრცელებს.

„ყირიმის ხიდზე ტერაქტის ორგანიზატორი იყო უკრაინის თავდაცვის სამინისტროს მთავარი სადაზვერვო სამმართველო, მისი უფროსი კირილ ბუდანოვი, თანამშრომლები და აგენტები. ასაფეთქებელი მოწყობილობა რულონებში იყო შენიღბული, სამშენებლო პოლიეთილენის ფირით 22 პალეტზე, რომლის საერთო წონა 22 770 კილოგრამს შეადგენდა“, - აცხადებენ უწყებაში.

რუსული მედიის ცნობით, აგვისტოს დასაწყისში ტვირთი გაიგზავნა ოდესის პორტიდან ბულგარეთის რუსეს პორტში, ბულგარეთიდან ტრანსპორტირება საქართველოს ფოთის პორტში, შემდეგ კი სომხეთში გაგრძელდა.

„გადატანაში მონაწილეობდნენ უკრაინის მოქალაქეები მიხაილ ციურკალო, დენის კოვაჩი, რომან სოლომკო, საქართველოს მოქალაქეები სანდრო ინასარიძე, ბროკერი სახელად ლევანი და სომხეთის მოქალაქე არტურ ტერჩანიანი“, - წერს რუსული მედია.

მათივე ცნობით, 29 სექტემბრიდან 3 ოქტომბრის ჩათვლით, ერევანში, ტრანსალიანსის ტერმინალში, ტვირთი განაბაჟეს, შემდეგ კი საქართველოში რეგისტრირებული DAF-ის სატვირთო მანქანით, ტვირთმა რუსეთ-საქართველოს საზღვარი 4 ოქტომბერს ზემო ლარსის საგუშაგოზე, გადაკვეთა ორი დღის შემდეგ კი არმავირის საბითუმო ბაზაზე მიიტანეს და გადმოტვირთეს.

მედიის ინფორმაციით, 7 ოქტომბერს უკრაინისა და რუსეთის მოქალაქეების დახმარებით, ტვირთის საბუთები კვლავ შეიცვალა, გამგზავნად მიუთითეს შპს TEK-34 ულიანოვსკიდან, ხოლო მიმღებად - ყირიმში არარსებული კომპანია.

„იმავე დღეს, პალეტები რუსეთის მოქალაქის, 1971 წელს დაბადებული მახირ იუსუბოვის სატვირთო მანქანაში ჩატვირთეს, ხოლო 2022 წლის 8 ოქტომბერს დილის 06:03 საათზე ყირიმის ხიდზე გადაკვეთისას აფეთქება განხორციელდა“,- აცხადებენ რუსეთის ფედერაციის უშიშროების ფედერალურ სამსახურში.

ipn.ge