მას შემდეგ, რაც მე მომეცა პოლიტიკურ პროცესებზე დაკვირვების და ჩართულობის შესაძლებლობა, ვფიქრობ, რომ არაფორმალური მმართველობის ფორმები საქართველოში არსებობს,- ამის შესახებ გახარიას გუნდის წევრმა, დეპუტატმა ბექა ლილუაშვილმა ჟურნალისტებთან განაცხადა, რითაც უპასუხა კითხვას, არის თუ არა საქართველოში არაფორმალური მმართველობა.
კითხვაზე, რატომ არ გააკრიტიკა გახარიამ ივანიშვილი და რა აქვს მასზე სათქმელი, ლილუაშვილი პასუხობს, რომ რა აქვს სათქმელი გიორგი გახარიას ბიძინა ივანიშვილზე, ეს მან არ იცის და გახარია თვითონ იტყვის თავის სათქმელს. რაც შეეხება დაფინანსების საკითხს, ლილუაშვილი აცხადებს, რომ ეს საჯარო იქნება.
„დაფინანსებასთან დაკავშირებით ბევრჯერ მოვისმინეთ სხვადასხვა სპეკულაცია, ერთნი გვაბრალებენ ბიძინა ივანიშვილის პროექტობას და მის მიერ დაფინანსებას, მეორე კეზერაშვილის მიერ დაფინანსებას, ეს პროცესი არის გამჭვირვალე, როცა პარტია დარეგისტრირდება და ეს პროცესი დაიწყება შემოწირულობების სახით, ყველა დაინტერესებული მხარე ნახავს ამას,“- განაცხადა ლილუაშვილმა.
IPN.GE