„ეს არის ბოიკოტი საკუთარი ამომრჩევლის და ხალხის და არა „ქართული ოცნების“ მიმართ“, - ამის შესახებ „ქართული ოცნების“ წევრმა, ბექა ოდიშარიამ „ქრონიკას“ განუცხადა.
მისი თქმით, პარლამენტი არის ის ადგილი, რომელიც იძლევა უმწვავესი პოზიციების დაფიქსირების საშუალებას და მასზე პასუხების მოსმენის.
„შესაბამისად, მინდა ვიფიქრო, რომ ოპოზიციის იმ ნაწილში, რომელიც პარლამენტში არ იმყოფება დღეს, საღი აზრი გაიმარჯვებს და მაინც მოახერხებენ თავის წარმომადგენლობის დასწრებას პარლამენტში, რაც ძალიან მნიშვნელოვანია - ყველა ნორმალურ ქვეყანას სჭირდება პარლამენტში ნორმალური ოპონირება, ძირითად ინსტიტუციაში ოპონირების გარეშე ყოფნა, რა თქმა უნდა, უხერხულობაა და სწორედ ამიტომ, ვფიქრობ, ვდგამთ იმ კონკრეტულ ნაბიჯებს, რომლებიც კონკრეტულ მოცემულობას შეესატყვისება და არ ვიშურებთ ძალისხმევას, რომ კიდევ ერთხელ მოვუწოდოთ ოპოზიციას, დაიკავონ ადგილები პარლამენტში“, - განაცხადა ბექა ოდიშარიამ.
მისივე თქმით, „ამაზე საუბრობენ ელჩები, საპატრიარქო, ერი და ბერი“.
„ვფიქრობ, ამაზე გააკეთა სწორი აქცენტები საქართველოს პრეზიდენტმა. მგონია, რომ შეისმენენ ჩვენს მოწოდებას, რომ მათ შეასრულონ თავისი ფუნქცია-მოვალეობები“, - აღნიშნა ბექა ოდიშარიამ.
imedinews.ge