რადიო „კომერსანტზე“ გადაცემის „ბრენდი საქართველო“ ავტორმა და წამყვანმა ლევან კობერიძემ თემაზე ,,ქვეყნის ბრენდის შექმნა საომარი მოქმედებების ფონზე“ განაცხადა, რომ უკრაინის წინააღმდეგ ომმა რუსეთი, როგორც სახელმწიფო ბრენდი, ჩამოშალა და დაანგრია.

,,ყოველ ომს მოაქვს ნგრევა, მაგრამ მიმდინარე ომმა  გამოიწვია არა მხოლოდ რუსეთის სახელმწიფოს დანგრევა და იზოლაცია, არამედ ბრენდი ,,რუსეთის“ ჩამონგრევა.  რაც ხდება, სასტიკი და გაუგებარია. ამ ომში არავინ არ არის მოგებული. დაახლოებით 20 წლით დასწია მან რუსეთის ეკონომიკა, ინგრევა უკრაინაც და ამით ჩვენთვისაც დიდი პრობლემა იქმნება“, - განაცხადა ლევან კობერიძემ.

მისი შეფასებით, ფაქტობრივად არ არის დარჩენილი ქვეყანა, რომელსაც მიმდინარე ომი ამა თუ იმ ფორმით არ შეეხო.  თუმცა ამ სიტუაციაში უკრაინამ სხვანაირად გამოანათა.

,,უკრაინისთვის განსაკუთრებული, გამოკვეთილი აღქმის წერტილი არ ჩანდა და დღეს შეიძინა.  ამით მან ერთხელ კიდევ დაადასტურა რუსეთის, როგორც აგრესორის და ოკუპანტის ბრენდის ჩამოშლა“, - დასძინა კობერიძემ.

გადაცემის წამყვანის შეფასებით,  ასეთ ნეგატიურ ფონზე განსაკუთრებით მნიშვნელოვანია საქართველოს, როგორც ბრენდის გაძლიერება. რაც დღევანდელ პირობებში ომის მოგების ერთ-ერთ მნიშვნელოვან ფაქტორად შეიძლება ჩაითვალოს.

როგორც ლევან  კობერიძემ აღნიშნა,  მომავალში, ღმერთმა ნუ ქნას, მაგრამ საქართველოს თუკი უკრაინის მსგავსი გამოწვევა დაუდგება,  ბრენდი გარკვეულწილად  წარმოაჩენს -  რისი უნარი აქვს  ქვეყანას ან თუნდაც სადამდე შეიძლება ბრძოლა აწარმოოს ნებისმიერი აგრესორის წინააღმდეგ.

მარი ჩიტაია