ბრიტანეთი რუსეთს აფრთხილებს, რომ უკრაინის წინააღმდეგ ქიმიური იარაღის გამოყენების შემთხვევაში პასუხი არსებულ სანქციებზე უფრო მკაცრი იქნება. ამის შესახებ ინფორმაციას ბრიტანეთის ტექნოლოგიების მინისტრ კრის ფილიპზე დაყრდნობით The Guardian ავრცელებს.
რუსეთის პროპაგანდისტულმა მანქანამ ბოლო დღეებში კიევი ქიმიური და ბიოლოგიური იარაღის გამოყენების მცდელობაში დაადანაშაულა. მოსკოვი ამტკიცებს რომ უკრაინის ლაბორატორიებში ამერიკელების დახმარებით ბიოლოგიურ იარაღზე მუშაობდნენ, რომელიც რომელსაც რუსი ეროვნების გენომი ექნებოდა შესწავლილი და მათ დასახოცად იქნებოდა გამოყენებული. კიევში, ლონდონსა და ვაშინგტონში ფიქრობენ, რომ ჩიხში შესულ პუტინს შესაძლოა თავად ჰქონდეს განზრახული ქიმიური ან ბიოლოგიური იარაღის გამოყენება და შემდეგ მომხდარის უკრაინისთვის გადაბრალება. ქიმიური იარაღი საკუთარი მოსახლეობის წინააღმდეგ 2018-2019 წლებში სირიაში სწორედ პუტინის მხარდაჭერილმა ასადის რეჟიმმა გამოიყენა.
ქიმიური იარაღის გარეშეც, მოსკოვი უკრაინაში არც სხვა აშკარა სამხედრო დანაშაულების ჩადენას ერიდება. ყველა საერთაშორისო შეთანხმებისა თუ კონვენციის დარევით ის იყენებს ასევე აკრძალულ თერმობარულ ე.წ. ვაკუუმურ ბომბებს, ბომბავს სკოლებს, უნივერსიტეტს, ბავშვთა სახლებს, საბავშვო ბაღებს, ბავშვთა ონკოლოგიურ საავადმყოფოს, საცხოვრებელ კორპუსებსა და სამშობიაროს, რომელსაც ექსტრემისტ ნაცისტთა ბაზად მოიხსენიებს. სამოქალაქო ობიექტებზე მიტანილ იერიშზე კომენტარი კრის ფილიპმაც გააკეთა და აღნიშნა, რომ მომხდარზე დასავლეთს „მკვეთრად გაზრდილი პასუხი“ ექნება.
ტექნოლოგიების მინისტრამდე ერთი დღით ადრე, ქიმიური იარაღის გამოყენების საშიშროებაზე პრემიერმა ბორის ჯონსონმაც ისაუბრა და სირიის მაგალითი გაიხსენა.
რუსეთი, რომლის საგარეო საქმეთა მინისტრიც აცხადებს, რომ უკრაინას თავს არ დასხმიან, კიევს ბირთვული იარაღის შექმნის მცდელობაშიც ადანაშაულებს. 1994 წელს უკრაინამ ბირთვული არსენალი ტერიტორიული მთლიანობის გარანტიების საფუძველზე დათმო. გარანტიას რუსეთი, ბრიტანეთი და აშშ იძლეოდნენ. 2014 წელს მოსკოვმა თავისი ხელმოწერილი დოკუმენტი ტრადიციულად დაარღვია, ყირიმის ნახევარკუნძული რუსეთის საკუთრებად გამოაცხადა, დონეცკისა და ლუგანსკის ოლქებში კი მარიონეტული რეჟიმები ჩამოაყალიბა. 8 წლის შემდეგ, 2022 წლის 21 თებერვალს პუტინმა მათი ე.წ. დამოუკიდებლობა აღიარა, 24 თებერვალს კი უკრაინის წინააღმდეგ სრულმასშტაბიანი ომი დაიწყო.
ინტერვენციის პირველივე დღეს რუსეთმა ჩერნობილის გაჩერებული ატომური ელექტროსადგური დაიკავა, შემდეგ ევროპაში ყველაზე დიდი ზაპოროჟიეს ატომური ელექტროსადგური, ბოლოს კი ხარკოვის ფიზიკის ინსტიტუტიც დაბლოკა სადაც ბირთვული რეაქტორები ინახებოდა. ომამდეც და ომის პერიოდშიც პუტინი მსოფლიოს ბირთვული ომით რამდენჯერმე დაემუქრა.
ქიმიური, ბიოლოგიური და ბირთვული იარაღის, როგორც მასობრივი განადგურების საშუალების გამოყენება აკრძალულია. ბიოლოგიური იარაღის მასობრივად გამოყენების ფაქტი დღემდე დადასტურებული არ არის, ბირთვული მეორე მსოფლიო ომის მიწურულს ჰიროსიმასა და ნაგასაკში ჩამოაგდეს. ქიმიური იარაღის გამოყენებას კი უფრო ფართო ისტორია აქვს, მასობრივად ის პირველად პირველ მსოფლიო ომში 1915 წლის იპრის ბრძოლაში გამოიყენეს, ბოლოს 2019 წელს ბაშარ ასადის ბრძანებით.
მოსკოვს პრეტენზიები მხოლოდ კიევთან არ აქვს და პერიოდულად ლუგარის ლაბორატორიის გარშემოც აქტიურდება. ქართულმა მხარემ რუსეთს საერთაშორისო დამკვირვებლების მისიის ფარგლებში რამდენჯერმე ლაბორატორიის სრულ შემოწმებაში მონაწილეობის მიღება შესთავაზა, მაგრამ მოსკოვმა ყველა შეთავაზება უარყო და შემოწმების ექსკლუზიური უფლება მოითხოვა.