საქართველოში რუმინეთის საელჩოსა და საარჩევნო ადმინისტრაციის თანამშრომლობის ფარგლებში, ცენტრალურ საარჩევნო კომისიას (ცესკო) დღეს 10 ერთეული პორტატიული კომპიუტერი გადაეცა. აღნიშნული კომპიუტერები, რომელიც ცენტრალურმა საარჩევნო კომისიამ სასაქონლო გრანტის სახით მიიღო რუმინეთის სრულუფლებიანმა ელჩმა საქართველოში რაზვან როტუნდუმ ცესკოს თავმჯდომარეს პირადად გადასცა.
გიორგი კალანდარიშვილმა ელჩს მხარდაჭერისთვის მადლობა გადაუხადა და საარჩევნო პროცესში საერთაშორისო საზოგადოების ჩართულობის მნიშვნელობაზე ისაუბრა.
„რუმინეთის საელჩოსა და საქართველოს საარჩევნო ადმინისტრაციას შორის მჭიდრო თანამშრომლობა ჩამოყალიბდა, რაც სხვადასხვა ტიპის აქტივობაში მათი მხარდაჭერით, მათ შორის საარჩევნო საკითხებზე პრაქტიკის გაზიარებასა და ტექნიკურ მხარდაჭერაში გამოიხატება. დღეს სწორედ ამ მხარდაჭერის ფარგლებში მივიღეთ პორტატიული კომპიუტერები, რომლებიც ჩვენი საქმიანობისთვის ძალიან მნიშვნელოვანია. დღევანდელ შეხვედრაზე ასევე მქონდა შესაძლებლობა ელჩისთვის პირადად მიმეწოდებინა ინფორმაცია გაზაფხულზე დაგეგმილი შუალედური/რიგგარეშე არჩევნების შესახებ. ვისაუბრე აღნიშნულ პროცესში ტექნოლოგიების გამოყენებისა და მსგავსი ფართომასშტაბიანი პილოტირების პროცესში საერთაშორისო დამკვირვებელი ორგანიზაციების როლზე. ასევე ვისაუბრეთ თანამშრომლობის გაღრმავების პერსპექტივებზე, რაც ძალიან მნიშვნელოვანია საარჩევნო ადმინისტრაციისთვის“, - განაცხადა გიორგი კალანდარიშვილმა შეხვედრის დასრულების შემდეგ.
ცესკო
