საქართველოს პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარეს ჯანდაცვის მინისტრთან ჯანდაცვის მიმართულებით კითხვები არ აქვს. ქართული ოცნების დეპუტატმა მინისტრის საათის ფორმატში ზურაბ აზარაშვილს უთხრა, რომ სხვა დეპუტატებზე მეტი ინფორმაცია აქვს და კითხვას კითხვისთვის არ დასვამს. თუმცა, მესამე პრეზიდენტის მიხეილ სააკაშვილის ჯანმრთელობის მდგომარეობის დამძიმების გამო, სპეკულაციების თავიდან ასარიდებლად, დიმიტრი ხუნდაძე დაინტერესდა, არის თუ არა ქვეყანაში მისი სრულფასოვანი რეაბილიტაციის შესაძლებლობა.
„ვფიქრობ ძალიან საინტერესო მოხსენება იყო, მრავალმხრივია ჩვენი სექტორი თქვენ მაქსიმალურად შეძელით ყველა მიმართულებით გესაუბრათ, თუმცა ალბათ იქნება საკითხები, რომელზეც საუბარს ვერ მოასწრებდით და კითხვებში მოგეცემათ საშუალება დააზუსტოთ ბევრი საკითხი. მე თემატურ კითხვებში არ შევალ, რამეთუ მეტი ინფორმაცია მაქვს, და ახლა კითხვას არ დავსვამ იმის გამო, რომ მარტო კითხვა დავსვა და იმაზე, რაზეც პასუხები ვიცი. მე მინდა შევეხო მიხელ სააკაშვილთან დაკავშირებულ თემას. იცით, რომ ხშირადაა სპეკულაციები ამ თემასთან დაკავშირებით, მიზანმიმართული დეზინფორმაცია და საზოგადოების გარკვეულ ნაწილს ზოგჯერ გაურკვევლობაში ვარდება. მე მინდა გკითხოთ ჯანდაცვის მინისტრის შეფასება როგორია. დღეს ქვეყანა უზრუნველყოფს თუ არა მიხეილ სააკაშვილის ჯანმრთელობის მდგომარეობას და არის თუ არა ქვეყანაში ის რესურსი, რაც მისი ჯანმრთელობის მდგომარეობიდან გამომდინარე შესაძლოა იყოს საჭირო ამა თუ იმ სერვის მიწოდების კუთხით“, - განაცხადა დიმიტრი ხუნდაძემ.