პარლამენტის იურიდიულ საკითხთა კომიტეტის სხდომაზე 25 ნოემბერს უზენაესი სასამართლოს მოსამართლეობის ორ კანდიდატს გენადი მაკარიძესა და თამარ ოქროპირიძეს მოუსმინეს, მოსამართლეთა შერჩევის პროცესს ოპოზიციური პარტიები უნდობლობას უცხადებენ. მათი განცხადებით, მმართველი პარტია საერთაშორისო პარტნიორების მოწოდების მიუხედავად მოსამართლეების უვადოდ დანიშვნის პროცესს მიზანმიმართულად არ აჩერებს და სასამართლო რეფორმას არ ატარებს, მმართველ გუნდში კი ოპოზიციის მოსაზრებას არ იზიარებენ.
„კომერსანტი“ დაინტერესდა, თუ რას ფიქრობენ „ერთიანი ნაციონალური მოძრაობის“ ხელისუფლების დროს დაზარალებული ბიზნესმენები საქართველოში არსებულ სასამართლო სისტემაზე და მოსამართლეების არჩევის წესზე და პროცესის შეფასებისთვის ბიზნესმენ ჯემალ ლეონიძეს დაუკავშირდა. მისი თმით, სასამართლო ჯანსაღ მდგომარეობაშია თუმცა არის ხარვეზები, რომლებიც მისნაირად დაზარალებულ ადამიანებზე უარყოფითად მოქმედებს.
“მე რასაც ვისმენ და ვუყურებ, სასამართლო ჯანსაღ მდგომარეობაშია, მაგრამ არის ხარვეზები, რაც ჩემნაირ დაზარალებულ და სამართლის მაძიებელ პიროვნებებზე უარყოფითად მოქმედებს, მე მაქვს ერთი დადებითი შემთხვევა, რომლითაც უზომოდ კმაყოფილი ვარ, ჩემი საქმეები წინ წავიდა, მაგრამ არის ისეთი სასამართლოც, სადაც უკანონობის სახით რამდენიმე წინააღმდეგობას წავაწყდი.
მაგალითად თბილისში, საქალაქო და სააპელაციო სასამართლოებში ჩემი საქმეები დაუყოვნებლად და 100%-იანი წარმატებით მიმდინარეობს, მე ძალიან ბევრი ქონებრივი დავა მაქვს, სტატისტიკურად რომ ავიღოთ, ალბათ პირველი ვარ, ვისაც სამოქალაქო, ადმინისტრაციული და სისხლის სამართლის დავები ამ რაოდენობით აქვს.
რაც შეეხება მცხეთის სასამართლოს, მანდ უკანონობას შევეჯახე, დაყადაღებული მაქვს საცხოვრებელი ფართი, აკრძალვა მაქვს გაკეთებული, მაგრამ 2016 წლიდან ვერ მოხერხდა ამ პროცესის ბოლომდე მიყვანა, ქალბატონმა ხაჟომიამ ეს საქმე ძალიან კარგად დაიწყო, არ ვიცი როგორ და რა ქნეს, გადმოიყვანეს თბილისის სააპელაციო სასამართლოში, მე ძალიან კმაყოფილი ვიყავი ამ ქალბატონით. შემდეგ საქმე გადაეწერა მაშინდელ სასამართლოს თავმჯდომარეს ახალბედაშვილს, მან საქმე რამდენჯერმე გაჭიმა, ტელეფონით მიპასუხა, რომ სერიოზული საქმეები ჰქონდა და ვერ იხილავდა ჩემ საქმეს, რომლის აღსრულება და შეფასება სასამართლომ უკანონოდ ცნო, მეორეხარისხოვნად ჩათვალა, ეს ბატონიც გადმოიყვანეს და ის უვადო მოსამართლეების სიაშია, მერე გადაეწერა ეს საქმე სხვას, ახლა ნადიბაიძეს აქვს და რამდენჯერმე მიმართვის მიუხედავად ამ საქმეს არანაირი წინსვლა არ აქვს“, - აღნიშნა ჯემალ ლეონიძემ.
რაც შეეხება მოსამართლეების დანიშვნას, ჯემალ ლეონიძე ამბობს, რომ მოსამართლეების დანიშვნა ამ წესით არ უნდა მომხდარიყო, ამ ფორმით 10 მოსამართლის საკითხი არ უნდა გაეტანათ. ლეონიძემ ასევე აღნიშნა, რომ ამ პროცესმა საკმაოდ გრძელი გზა გაიარა, ბევრი პარლამენტარის პარლამენტარობაც შეეწირა.
“მოსამართლეების დანიშვნის წესმა რა გზებიც გაიარა, მოსახლეობისთვის ცნობილია, ეს ასე არ უნდა მომხდარიყო, შეეწირა რამდენიმე პარლამენტარის პარლამენტარობა, იმ ფორმით არ უნდა გაეტანათ მაშინდელი 10 მოსამართლის საკითხი, მე ვეთანხმები იმას, რაც მაშინ საზოგადოებაში პულსირებდა, მაგრამ მოხდა ის რაც მოხდა. ახლა მაგალითად კიდევ დასაფიქრებელია, კიდევ მიმდინარეობს პროცესი, მე გუშინ მოვუსმინე მოსამართლეების პასუხებს, ყველა კარგად საუბრობს, სიტყვა-პასუხი არავის ეშლება, მაგრამ კლანზე რომ არის საუბარი, ალბათ მართებულია, ეს საქართველოა, საქართველოში ქართული მენტალიტეტია და ალბათ ეს ბრალდება, რასაც საზოგადოების ფართო მასები უყენებენ მოსამართლეებს, მართებულია. მათ ერთმანეთთან ახლობლობა, ნათესაობა და ერთად მუშაობის სტაჟი აკავშირებთ, რაც მიმაჩნია რომ მოსამართლეების არჩევაში დამაბრკოლებელი ფაქტორებია.
სამომავლოდ ყველა ნორმალურ ადამიანს იმედი გვაქვს, რომ ცხოვრება ვითარდება, განვითარდება სასამართლო სისტემაც და განვითარდეთ ჩვენც, ჯერ ჩვენ ჩვენ თავს უნდა მოვთხოვოთ განვითარება და მერე სასამართლოს, პროკურატურას და ჩვენ მეზობელს.
რასაც მე ვუყურებ ჯერ ჩვენც, საზოგადოებაც არ ვართ ექსტრა კანონიერი, ჩვენც ვცოდავთ ხოლმე, მაგრამ ყველა ადამიანს მიაჩნია და სურს რომ რაც ჩვენთვის კანონიერია, სხვისთვის უკანონობა იყოს და ესეც ალბათ დაიხვეწება და კალაპოტში ჩადგება“, - აღნიშნა ჯემალ ლეონიძემ.
უზენაეს სასამართლოში მოცემული მომენტისთვის 5 ვაკანტური ადგილია, რომლებზეც მოსამართლეები უვადოდ უნდა დაინიშნონ.
თაკო კვაჭანტირაძე