"გავრცელებული ბრალდებები და ადამიანთა ჩვენებები დაშინებასთან, საჯარო მოხელეებზე არსებულ ზეწოლასთან, ადმინისტრაციული რესურსების არასათანადო გამოყენებასთან დაკავშირებით, დაუყოვნებლივ უნდა იქნას გამოძიებული, რათა საზოგადოებაში უფრო მეტად არ გაძლიერდეს დაუსჯელობის განცდა," - ამის შესახებ ევროპარლამენტარებით დაკომპლექტებული სადამკვირვებლო მისიის ხელმძღვანელმა მაიკლ გალერმა დღეს გამართულ პრესკონფერენციაზე განაცხადა.

მან ხელისუფლების წარმომადგენლებსა და ყველა პოლიტიკურ პარტიას მოუწოდა გაითვალისწინოს მოსახლეობის მიერ არჩევნების მიმართ გამოხატული დამოკიდებულება, რომელიც მათ აქტიურობაში გამომჟღავნდა, დაასრულონ პოლიტიკური განხეთქილება და ქვეყანა უზრუნველყონ საჭირო რეფორმების განხორციელებით.

„საქართველოს მოსახლეობას მინდა მივულოცო გაცილებით მაღალი აქტიურობა არჩევნებზე, ვიდრე ეს იყო გასულ ადგილობრივი თვითმმართველობის არჩევნებში. თქვენ წახვედით საარჩევნო უბნებზე და გამოიყენეთ დემოკრატიული უფლება, რათა აგერჩიათ თქვენი ადგილობრივი წარმომადგენელი. თქვენი მონაწილეობა არის დასტური, რომ თქვენ გსურთ თანამონაწილეობა გადაწყვეტილებებში, რომლებიც გავლენას ახდენს თქვენს ცხოვრებაზე.

ევროკავშირი განიხილავს საქართველოს პრიორიტეტულ პარტნიორად, ჩვენი ურთიერთობა დაფუძნებულია ასოცირებულ შეთანხმებაზე და ღრმა და ყოვლისმომცველ სავაჭრო სივრცის შესახებ შეთანხმებაზე, ამას უკვე ჰქონდა გავლენა, თუ როგორ ხედავენ საქართველოს მოქალაქეები თავის მომავალს, ევროკავშირსა და ტრანსატლანტიკურ უსაფრთხოების განზომილებაში ინტეგრაციის გზაზე. ეს უკანასკნელი რამდენიმე წელი რთული იყო თქვენი ქვეყნისთვის არა მხოლოდ პანდემიის გამო, არამედ, ასევე, ხანგრძლივი პერიოდის განმავლობაში მიმდინარე პოლიტიკური დაპირისპირების გამო, რომლის დეესკალაციაც დაპირისპირებულმა მხარეებმა ჯერ კიდევ სათანადოდ ვერ მოახერხეს. წინასაარჩევნო გარემო იყო კონკრეტული, მაგრამ არ იყო შექმნილი თანასწორი ნიადაგი მოწინააღმდეგე პარტიებისა და კანდიდატებისთვის. გავრცელებული ბრალდებები და ადამიანთა ჩვენებები დაშინებასთან, საჯარო მოხელეებზე არსებულ ზეწოლასთან, ადმინისტრაციული რესურსების არასათანადო გამოყენებასთან დაკავშირებით დაუყოვნებლივ უნდა იქნას გამოძიებული, რათა უფრო მეტად არ გაძლიერდეს საზოგადოებაში დაუსჯელობის განცდა. ბალანსის არ არსებობა დაფინანსების ნაწილში, ასევე, საჭიროებს რეაგირებას. ვისურვებდით, რომ ხელისუფლებამ და ყველა პოლიტიკურმა პარტიამ მიბაძოს მოსახლეობის მომწიფებულ დამოკიდებულებას არჩევნების მიმართ, რომელიც მათ საარჩევნო პროცესში მონაწილეობით გამოიჩინეს.

ახლა დროა გადაშალოთ ეს ფურცელი და ქვეყანა გამოვიდეს პოლიტიკური ჩიხიდან. მოსახლეობა ელის, რომ საქართველოს სრული პოლიტიკური კლასი დაასრულებს არსებულ განხეთქილებას და უზრუნველყოფს მათ საჭირო რეფორმებით,“- განაცხადა გალერმა.

წყარო: ინტერპრესნიუსი