რადიო „კომერსანტის“ ეთერში, ლევან კობერიძის საავტორო გადაცემაში „ბრენდი საქართველო“, საპენსიო ფონდის ყოფილმა დირექტორმა, ფინანსისტმა ლევან სურგულაძემ, საპენსიო ფონდში დამოუკიდებელი მაკონტროლებელი სტრუქტურული ერთეულის არსებობის აუცილებლობაზე ისაუბრა.
მისი თქმით, ძალიან მნიშვნელოვანია, რომ საპენსიო სააგენტოს დამოუკიდებელი რისკის კონტროლის მექანიზმი გააჩნდეს და ყოველი ტრანზაქციის დონეზე რისკი-ამონაგების თანაფარდობა. სურგულაძე მიიჩნევს, რომ უნდა არსებობდეს რისკის ბიუჯეტი არ მოხდეს იმაზე მეტი რისკის აღება, რის საშუალებასაც ბიუჯეტი იძლევა.
ლევან სურგულაძის თქმით, დამოუკიდებელი სტრუქტურული ერთეულის აუცილებლობის შესახებ კანონშიც არის ჩანაწერი, თუმცა ჩარჩო დონეზე და მისი განვითარება საერთაშირისო პრაქტიკისა და რეგულაციების შესაბამისად უნდა მოხდეს.
„კანონში ყველა ის დებულებაა გაწერილი, რომლის საფუძველზეც სააგენტო შეიქმნა და ფონდი იმართება, მაგრამ მასში ყველაფერს ვერ გავწერდით, იქ ჩარჩოა მოცემული, დანარჩენი საერთაშორისო პრაქტიკიდან და რეგულაციებიდან უნდა ავიღოთ. ამისათვის საერთაშორისო მარეგულირებლები არსებობენ და მათ აქვთ რეკომენდაციები, რომელიც სავალდებულოა როგორც ბანკებისთვის, ასევე მსგავსი ფონდებისთვის. ეს კრიტიკულად მნიშვნელოვანია. ყველა ჩემს გამოსვლასა და პუბლიკაციაში ვსაუბრობ, რომ ეს უნდა გაკეთდეს საუკეთესო საერთაშორისო სტანდარტის მიხედვით. ამის შესახებ პირდაპირი მითითებაცაა მოცემული ევროდირექტივაშიც, რომლის შესრულების ვალდებულებაც ავიღეთ. იქ კონკრეტული ევროდირექტივაა, 76-ე მუხლში პირდაპირ წერია, როგორ უნდა გავაკეთოთ ეს. ამიტომ, ეს უნდა გაკეთდეს,“ - აცხადებს ლევან სურგულაძე