მანიპულაცია, თითქოს დღეს დგას მიხეილ სააკაშვილის თანამდებობაზე მოსვლის საკითხი, არის უსინდისობა - მას გაცხადებული აქვს, რომ თანამდებობა არ უნდა და დღეს ის დგას სიკვდილის საფრთხის წინაშე,- ამის შესახებ „დროას“ ლიდერმა ელენე ხოშტარიამ განაცხადა. მისივე თქმით, ის „ვინმეს ერთპიროვნულ მობრუნებაში“ არათუ მონაწილეობას არ მიიღებს, არამედ წინააღმდეგობას გაუწევს.

„რაც შეეხება ჩემს პოლიტიკურ პოზიციას, მე არ ვარ სააკაშვილის ამომრჩეველი, არ მიმაჩნია, რომ უნდა დავბრუნდეთ წარსულში, ღრმად და მტკიცედ მჯერა კოალიციის და ჩემი პოლიტიკურად თანამშრომლობა „ნაციონალურ მოძრაობასთან“ გამომდინარეობს, ნიკა მელიას, „ნაციონალური მოძრაობის“ და ამ შემთხვევაში სააკაშვილის დღევანდელი პოზიციით, რომ კოალიცია არის ერთადერთი გამოსავალი. თუ ეს პოზიცია შეიცვლება მე ასევე შევცვლი პოზიციას და სხვა კონფიგურაციაში, ვინმეს ერთპიროვნულ მობრუნებაში არათუ მონაწილეობას არ მივიღებ, არამედ გავუწევ წინააღმდეგობას. ეს ჩემი პოზიციაა და არანაირ კავშირშია იმ სოლიდარობასთან, რომელსაც ვუცხადებ სააკაშვილს. მე ვერ შევიცვლი პოზიციას სააკაშვილზე ჩემ კრიტიკასთან დაკავშირებით, მე ამას პირადად ვეუბნები სააკაშვილს და არავისთვის ეს სიახლე არ არის. მიხეილ სააკაშვილი დღეს არის სიკვდილის საფრთხის წინაშე, მანიპულაცია „ქართული ოცნების“ მხრიდან, ტელევიზიების მხრიდან, თითქოს დღეს დგას მიხეილ სააკაშვილის თანამდებობაზე მოსვლის საკითხი არის უსინდისობა. მას გაცხადებული აქვს, რომ თანამდებობა არ უნდა და დღეს ის დგას სიკვდილის საფრთხის წინაშე, ამიტომ პრიორიტეტები უნდა განვსაზღვროთ ყველამ, ნამუსი არ უნდა დავკარგოთ, რაც არ უნდა პოლიტიკური კონიუქტურა არსებობდეს“, - განაცხადა ელენე ხოშტარიამ.

IPN.GE