საარჩევნო და საზოგადოებრივ საკითხებზე მომუშავე ექსპერტები ელექტრონული საარჩევნო ტექნოლოგიების მუშაობას გაეცნენ. საარჩევნო პროცესში ელექტრონული ტექნოლოგიების დანერგვა იყო ერთ-ერთი საკითხი საარჩევნო ადმინისტრაციის ინიციატივით გამართულ სამუშაო შეხვედრაზე. ექსპერტებმა ელექტრონული ტექნოლოგიების გამოყენებით იმიტირებულ კენჭისყრაში მიიღეს მონაწილეობა და პრაქტიკაში გამოცადეს ელექტრონული საარჩევნო ტექნოლოგიების - ვერიფიკაციის, ხმის მიცემისა და დათვლის აპარატების მუშაობა.
ტექნოლოგიური სიახლეების გარდა ექსპერტები გაეცნენ საარჩევნო ადმინისტრაციის 2023-2026 წლების სტრატეგიული გეგმის პროექტს. გეგმის დამტკიცების შემდეგ დოკუმენტი იქნება საჯარო.
როგორც ცენტრალური საარჩევნო კომისიის თავმჯდომარე გიორგი კალანდარიშვილმა შეხვედრისას აღნიშნა, მიმდინარე საარჩევნო პროცესების, ტექნოლოგიური და საკანონმდებლო სიახლეების შესახებ ექსპერტებისთვის სრულყოფილი ინფორმაციის მიწოდება განსაკუთრებით მნიშვნელოვანია. მათი პროფესიული, კვალიფიციური და ექსპერტული მოსაზრებების და რეკომენდაციების მოსმენა მნიშვნელოვნად შეუწყობს ხელს საარჩევნო ადმინისტრაციას საქმიანობის განხორციელებაში.
„დატვირთული და ნაყოფიერი გამოვიდა სამუშაო შეხვედრები ადგილობრივ ექსპერტებთან. ჩვენ მათთან ერთად განვიხილეთ ყველა ის მნიშვნელოვანი ცვლილება, რომელიც გამომდინარეობს განხორციელებული საარჩევნო რეფორმიდან. განვიხილეთ მათი აღსრულების გზები. წარვუდგინეთ ჩვენი ხედვა სხვადასხვა საკითხთან დაკავშირებით, რასაც მოჰყვა ინტენსიური განხილვა და რეკომენდაციები. ამ რეკომენდაციებს აუცილებლად განვიხილავთ და შესაძლებლობების ფარგლებში მაქსიმალურად გავითვალისწინებთ, იმისთვის რომ ერთობლივად უზრუნველვყოთ პროცესების გაუმჯობესება და ამომრჩევლებს მომავალი არჩევნები კვლავ მაღალი სტანდარტების შესაბამისად შევთავაზოთ“,-განაცხადა გიორგი კალანდარიშვილმა.
„ეს იყო დიალოგის და კომუნიკაციის ძალიან კარგი მაგალითი, გვქონდა შესაძლებლობა მოგვესმინა სიახლეები, ხედვები, გეგმები და ჩვენი მხრიდან გამოგვეთქვა მოსაზრებები შენიშვნები, რაც დარწმუნებული ვარ გადამუშავდება და დაეხმარება ცესკოს პროცესის სრულყოფისთვის. ასევე ვნახეთ ელექტრონული ხმის მიცემის პროცედურა, რაც მნიშვნელოვნად გააუმჯობესებს ადმინისტრირების ნაწილს უშუალოდ არჩევნების დღეს როგორც სისწრაფის თვალსაზრისით, ისე სიმარტივის და დათვლის თვალსაზრისით, რაც მნიშვნელოვანი სიახლე იქნება“, - განაცხადა შეხვედრის დასრულების შემდეგ პოლიტიკური სამართლის სპეციალისტმა, ვახუშტი მენაბდემ.
საარჩევნო პროცესში ელექტრონული ტექნოლოგიების დანერგვის უპირატესობების, ასევე ცესკოს სტრატეგიული გეგმის პროექტის შესახებ ისაუბრა „ჯეპრას“ უფროსმა კონსულტანტმა სოსო გალუმაშვილმა - „ვნახეთ სტრატეგიული გეგმა, ის დოკუმენტები, რომელიც მომზადებულია ცესკოს მიერ. შეიძლება ჩაითვალოს, რომ არჩევნების ჩატარება უკვე პროცედურულ ნაწილში იქნება სამართლიანი, გამჭვირვალე და თავისუფალი, რომელსაც ენდობიან მოქალაქეები. ეს არის სწორედ ცესკოს ხედვაში ასახული და ვფიქრობ, რომ ამ ხედვასთან მიახლოებას ამ სტრატეგიის განხორციელებით ცესკო თავისუფლად შეძლებს. ასევე, ვფიქრობ, რომ იმ რისკებს, რომელიც ადრე დაკავშირებული იყო პროცედურებთან, ფაქტობრივად ნიველირებას გაუკეთებს ეს ტექნოლოგიები“.
საარჩევნო და საზოგადოებრივ საკითხებზე მომუშავე ექსპერტებთან კომუნიკაციის გაძლიერებისა და სამომავლო თანამშრომლობის მიზნით, ახალ ფორმატში, შეხვედრა მეორედ გაიმართა. მსგავსი შეხვედრები, სადაც მიმდინარე აქტუალურ საარჩევნო საკითხებს განიხილავენ, პერმანენტულად ჩატარდება.