ბიზნესმენი თემურ ჭყონია ე.წ აგენტების შესახებ კანონპროექტს რუსული სულისკვეთებით გამსჭვალულს უწოდებს და აცხადებს, რომ ნებისმიერი მოქალაქის ვალია ამ კანონის წინააღმდეგ ხმა აიმაღლოს.

ეს არის მოქალაქეობრივი ვალი, რომ საშინელი კანონპროექტის წინააღმდეგ გამოთქვა აზრი ან შეფასება გააკეთო.

„ეს არის ნებისმიერი მოქალაქის ვალი და არა ზოგადად ექიმის, მასწავლებლის ან რომელიმე სფეროს წარმომადგენლის. მე, როგორც საქართველოს მოქალაქეს, მიმაჩნია, რომ კანონი რომელიც შემოდის არის რუსული სულისკვეთებით გამსჭვალული. გადმოწერილია თუ გადაწერილი ჩემთვის მნიშვნელობა არ აქვს. ეს არის ბოლშევიკური, რუსული სულისკვეთებით ჩამოყალიბებული კანონი. როდესაც საუბრობენ, რომ ეს არის ამერიკული, ეს არის შეცდომა, იმიტომ რომ ამერიკელი კანონმდებლები, პოლიტიკოსები, კონგრესის წევრები ამბობენ, რომ ეს არ არის ამერიკული კანონი. აქედან გამომდინარე არავითარი უფლება არ გაქვს რომ შევაფასოთ როგორც ამერიკული. ზნეობრივი უფლებაც არ გვაქვს,  არათუ ცოდნიდან გამომდინარე,“- აცხადებს თემურ ჭყონია.

თემურ ჭყონიას თქმით, მიუღებელია არა მხოლოდ კანონის შინაარსი, არამედ ის ფორმაც, რა ფორმითაც პარლამენტი ამ კანონს განიხილავს. მისი თქმით, პოლიტიკური გადაწყვეტილებების მიღება ხდება არა სახელმწიფო ინტერესით, არამედ ვიღაცის ჯიბრზე:
 

„საზოგადოების ჯანსაღი, უდიდესი ნაწილი არ ეთანხმება ამ კანონის შემოღებას საქართველოში. მაშინ ჩვენ თუ გამჭვირვალობას ვითხოვთ, ნებისმიერი დარგის გამჭვირვალობა უნდა მოვითხოვოთ: მასწავლებლის გამჭვირვალობა, მძღოლის, ექიმის, მსახიობის და სხვა, თუ საიდან ფინანსდებიან.

ჯერ ერთი როგორი საშინელი, უზრდელური, უწესო მიმართვებით იღებენ ამ კანონს. როგორი ჯიბრით, როგორი შურით, როგორი შუღლით, როგორც შეიძლება პოლიტიკოსი ერქვას ადამიანს, რომელიც არ მიდის კომპრომისზე და პოლიტიკურ გადაწყვეტილებებს იღებს არა სახელმწიფოებრივს, არამედ ვიღაცის ჯიბრზე.  ესენი ჯიბრზე იღებენ. რა მორალური უფლება აქვთ, ვინ  მისცა ამის უფლება რომ ქვეყანას მოახვიონ ისეთი კანონი რომელსაც ეწინააღმდეგება მსოფლიოს ყველა ქვეყნის პოლიტიკოსი,“- აღნიშნა ჭყონიამ.
 

თემურ ჭყონიას შეფასებით, კატასტროფაა, როდესაც ქვეყანა ეჯიბრება უსამართლოდ, არგუმენტების გარეშე მთელ ცივილიზებულ სამყაროს

„ევროპარლამენტის თავმჯდომარე თუ საბჭოს თავმჯდომარე, რომელიც საქართველოშია და წარმომადგენელი ამბობს, რომ ამ კანონის მიღება შეაფერხებს და სერიოზულად შეაფერხებს საქართველოს ევროკავშირის კანდიდატის სტატუსის მიღებას, ეუბნება პირდაპირ, მეტი რა თქვას ამ კაცმა? ხომ არ შეაგინებს. რა ქნას? ან ხომ არ დაიფიცებს?

ჩვენ მაინც ჯიბრზე, ჯიბრზე... ეს არის კატასტროფა, როდესაც ქვეყანა ეჯიბრება უსამართლოდ, არგუმენტების გარეშე მთელ ცივილიზებულ სამყაროს.

ისმის კითხვა, ჩვენ თუ არ გვინდა ევროპა, თუ არ გვინდა ამერიკა, არ გვინდა რუსეთი, მაშინ რა გვინდა? მაშინ პოლიტიკოსებმა გვითხრან, განგვისაზღვრონ  თუ მოგვეწონება არ ვიცი, ჩვენ რა გვინდა. ჩვენს აზრს ხომ არავინ არ ითვალისწინებს. სამწუხაროდ, არის მართვა, რომელიც ითვალისწინებს ერთი პარტიის აზრს, სხვა აზრი ქვეყანაში არ არსებობს. რომელი საუკუნეა. მე ვთხოვ ყველა მოქალაქეს, ვთხოვ, რა რა უფლება მაქვს ვინმეს რამე ვთხოვო, მაგრამ მე მაინც ვფიქრობ, რომ აქ გადამწყვეტი, უდიდესი როლი უნდა შეასრულოს ახალგაზრდა სტუდენტებმა. თაობა რომელიც ამ კანონს იღებს 10 წელიწადში პოლიტიკაში არ იქნება, და ის კანონი შეიძლება დამკვიდრდეს იმ თაობისათვის რომელიც თავის მომავალს უკავშირებს ევროპას და ცივილიზებულ სამყაროს. ეს თაობა უნდა იყოს პროცესის გამომხატველი და არა მარტო ის ადამიანები, რომლებიც დღეს დგანან და გამოხატავენ პროტესტს,“- განაცხადა ბიზნესმენმა.