„უცხოური გავლენის გამჭვირვალობის შესახებ“  „ხალხის ძალის“ მიერ მომზადებული კანონპროექტს, რომელიც  თავისუფალი სამოქალაქო საზოგადოების ორგანიზაციებისა და კრიტიკული მედიის წინააღმდეგ არის მიმართული,  ეკონომისტი მიხეილ კუკავა ეხმაურება. მისი შეფასებით, კანონპროექტი დონორი ორგანიზაციების გაშავება-დემონიზებას ემსახურება.

„იმ დონორების უმეტესობა, ვინც სამოქალაქო სექტორს გვაფინანსებს, მთავრობასაც გაფინანსებთ, მაგ., USAID, SIDA, ევროკავშირი, მსოფლიო ბანკი.  ჩვენს საერთო დამფინანსებლებს ნახავთ:

სახელმწიფო ბიუჯეტის კაპიტალური ბიუჯეტის დანართში mof.ge-ზე სახ. ბიუჯეტის განყოფილებაში

ხაზინის ფორმაში E12. treasury.ge-ზე ბიუჯეტის განყოფილებაში ჩამოშალეთ სახელმწიფო ბიუჯეტის შესრულების ანგარიშგება, მაგ., 2022 წლის სახელმწიფო ბიუჯეტის შესრულების ანგარიშგება. აქ დეტალურადაა დამფინანსებლები, დაფინანსების სახე (გრანტი, კრედიტი), მათ შორის დონორების თანადაფინანსებით განსახორციელებელი საინვესტიციო პროექტები. ამ ფორმაში ნახავთ ჩვენს და თქვენს არაერთ საერთო დონორს (გრანტები) და თქვენს შეღავათიან კრედიტორს. 

მოკლედ, ჩვენ ნამდვილად ვართ დასავლური და, მაშასადამე, უცხოური გავლენის აგენტები. თქვენ? მარტივია  ამ კითხვაზე თქვათ, რომ ქართველი ხალხის აგენტები ხართ. სოფისტიკა ხო განცხრომაა. ისე, იყო დრო, როცა სოფისტები პატივსაცემ ხალხად ითვლებოდა ძველ საბერძნეთში, სანამ სალანძღავ სიტყვად არ აქციეს სოფიზმი.

მიუხედავად იმ ბრალდებებისა, რაც თქვენი მისამართით ისმის, მე და ჩემს გარშემო არაერთ ადამიანს თქვენც დასავლური გავლენის აგენტები გვგონიხართ. ჯერ კიდევ გვგონია ხვდებით, რომ დასავლეთის მხარდაჭერა ამ ქვეყნის  გადარჩენის ერთადერთი გარანტიაა. გვითხარით, თუ ასე არ ფიქრობთ.

ეს დონორები თქვენც გაფინანსებენ, მაგრამ იქვე ჩვენც გვაფინანსებენ, რომ გარედან შეგახედოთ იმას, რასაც აკეთებთ. ასე იქცევიან ქვეყნის კეთილისმყოფელები. რუსეთივით იარაღს კი არ გვაწვდიან თქვენ ცალკე და ჩვენ ცალკე, რომ ერთმანეთი დავხოცოთ, როგორც სამოქალაქო ომის დროს.

კარგად აგვიხსენით რას ვაშავებთ. იმას, რომ

დამოუკიდებლად ვაანალიზებთ, ვაფასებთ მოვლენებს?

გთხოვთ ჩვენთან ერთად განიხილოთ ამ ანალიზის და შეფასების მიგნებები და რეკომენდაციები?

ტექნოკრატიულად გაქებთ, როცა ვფიქრობთ, რომ კარგს აკეთებთ?

ტექნოკრატიულად გაკრიტიკებთ, როცა ვფიქრობთ, რომ ცუდს აკეთებთ?

წარმატებული სახელმწიფო უწყებების საქმიანობას ჯილდოების გადაცემით აღვნიშნავთ?

პრობლემა ის არის, რომ ჩვენთვის უცხოური გავლენის აგენტის იარლიყის მოწებების მიზანი არა მხოლოდ ჩვენი, არამედ ჩვენი და თქვენი დამფინანსებლების გაშავება-დემონიზებაა ლუკმა-პურის საშოვარზე გადაგებული  ხალხის თვალში, რომელსაც არც დრო აქვს და არც ენერგია, გაარკვიოს რას და რატომ ვაკეთებთ.  ეს დამფინანსებლები ამ ქვეყნის კეთილისმყოფელები არიან.

სხვა რას ემსახურება ეს  კანონპროექტი თუ არა ამ კეთილისმყოფელების გაშავება-დემონიზებას?! ინიციატორებთან საქმე არ გვაქვს. თქვენ გვითხარით,“- წერს მიხეილ კუკავა ფეისბუკზე.