ნარიყალას წმინდა ნიკოლოზის სახელობის ეკლესიის დეკანოზი ზაზა თევზაძე ე.წ. აგენტების კანონის მიღებას ეხმაურება და აცხადებს, რომ ეს კანონი იმისთვის სჭირდებათ, რომ ქართველი ხალხი მოექცეს სრულ იზოლაციაში და გახდეს იოლი გადასაყლაპი ლუკმა რუსეთისთვის. მისი თქმით, ეს არ არის უბრალოდ არასამთავრობოების წინააღმდეგ და ჟურნალისტების წინააღმდეგ მიღებული კანონი, ეს კანონი გილიოტინის და გენოციდის ტოლფასია.

„ეს კანონი იმისთვის სჭირდებათ, რომ ქართველი ხალხი მოექცეს სრულ იზოლაციაში და გახდეს იოლი გადასაყლაპი ლუკმა რუსეთისთვის. ამ კანონის იქით აღარაფერი გვრჩება. ვინც გაიაზრა ეს, იცის.

ეს არ არის უბრალოდ არასამთავრობოების წინააღმდეგ და ჟურნალისტების წინააღმდეგ მიღებული კანონი. ეს არის ძალიან შორს მიმავალი გეგმის ნაწილი. ეს არის ის სასიკვდილო წერტილი, რომელიც ფაქტობრივად გილიოტინის და გენოციდის ტოლფასია ჩვენი ერისთვის და მომაკვდინებელია და ამის დათმობა და გატარება არ შეიძლება. ამიტომ დგას აქ ამდენი ხალხი და მადლობა ღმერთს რომ ეს ძალიან ბევრმა ადამიანმა შეიგნო. ეს არის ყველაზე დიდი გამარჯვება. ყველაფერს გადაფარავს აქ დგომა. ამით გამოჩნდა ქართველი ხალხის ნება და რა ხელისუფლებაც გვყავს, ისიც გამოჩნდა“, - აცხადებს დეკანოზი ზაზა თევზაძე.

მისი თქმით, ხელისუფლება ასეთ რეაქციას არ ელოდა ხალხისგან და ასეთი ძალადობის და დამოკიდებულების შემდეგ, მათ არანაირი - არც მორალური და არც სამართლებრივი უფლება არ აქვთ „იცხოვრონ ხალხის სახელით“.

„ბავშვები, მოხუცები, ქალები ხელაწეული დგანან და ესენი არბევენ მოსახლეობას და გაზს უშვებენ, ცივ წყალს ასხამენ, ერთია — ტყვია არ უსვრიათ. მათ არანაირი - არც მორალური, არც სამართლებრივი უფლება არ აქვთ, რომ იცხოვრონ ხალხის სახელით“, - აცხადებს დეკანოზი ზაზა თევზაძე.