რუსეთის საგარეო საქმეთა მინისტრმა სერგეი ლავროვმა საქართველოს  ხელისუფლება შეაქო იმის გამო, რომ რუსეთის წინააღმდეგ სანქციებს არ უერთდება. „ეხო კავკაზას“ ინფორმაციით, ამის შესახებ მან პროკრელისტური სატელევიზიო არხის „ალტ-ინფოს“ კითხვის პასუხად განაცხადა.

„მოხარული ვარ, რომ საქართველოსთან ხალხს შორის კონტაქტი აქტიურად ვითარდება. მითხრეს, რომ შარშან საქართველოს მშპ 10%-ით გაიზარდა, ძირითადად ტურიზმისა და რუსეთის ფედერაციასთან სავაჭრო ურთიერთობების გამო. ვიმედოვნებ, რომ მალე შევძლებთ პირდაპირი ფრენების აღდგენას.

ჩვენ ვხედავთ, რამდენად  დიდია  ზეწოლა საქართველოსა და სხვა ქვეყნებზე დასავლეთის მხრიდან, რომელიც ღიად და საჯაროდ მოითხოვს რუსეთის ფედერაციის წინააღმდეგ სანქციების დაწესებას. და ის, რომ პატარა ქვეყანას და მის მთავრობას აქვს გამბედაობა, თქვას, რომ „ჩვენ ვიხელმძღვანელებთ ჩვენი ინტერესებით, ჩვენი ეკონომიკის ინტერესებით“, ეს პატივისცემას მოითხოვს“, - განაცხადა ლავროვმა.

რუსეთის საგარეო უწყების ხელმძღვანელი ამბობს, რომ რუსეთს ქართველ ხალხთან არანაირი პრობლემა არ აქვს. გარდა ამისა, მისი თქმით, ის უზარმაზარ პატივს სცემს საქართველოს მართლმადიდებელი ეკლესიის პოზიციას, რომელიც მისი თქმით, ტრადიციულ ღირებულებებს იცავს.

„დიახ, იყო 2008 წლის ამბავი. მაგრამ აქაც ნატომ ითამაშა თავისი როლი, როდესაც ნატოს ბუქარესტის სამიტზე აპრილში, მიიღეს დეკლარაცია, სადაც ნათქვამი იყო, რომ უკრაინა და საქართველო იქნებიან ნატოში. სააკაშვილი გადაირია და გადაწყვიტა, რომ ეს ყველაფერი მისთვის ინდულგენცია იყო. შემდეგ იქ კონდოლიზა რაისიც ჩავიდა, ერთი თვით ადრე სააკაშვილის მიერ ცხივალისა და სამშვიდობოების პოზიციების დაბომბვის ბრძანების გაცემამდე.

უკრაინელებს ცოტა მეტი დრო დასჭირდათ იმისთვის, რომ ბუქარესტის იმპულს იმ ადამიანების ცნობიერებამდე მიეღწია, რომლებმაც გადაწყვიტეს, რომ თავისი ტერიტორიებიდან ყველაფერი რუსული განდევნონ, - განაცხადა ლავროვმა.

საქართველოს პრემიერ-მინისტრმა ირაკლი ღარიბაშვილმა არაერთხელ განაცხადა, რომ საქართველო არ მიუერთდება დასავლეთის მიერ რუსეთისთვის დაწესებულ სანქციებს და რუსეთთან ომი არ იქნება.