საქართველოს სავიზო პოლიტიკის გათანაბრება ევროკავშირის მესამე ქვეყნების სიასთან ერთ-ერთია იმ რეკომენდაციათაგან, რომელიც უვიზო რეჟიმის შესახებ ევროკომისიის რიგით მეხუთე ანგარიშში გამოქვეყნდა.

„საქართველოს სავიზო პოლიტიკის გათანაბრება ევროკავშირის მესამე ქვეყნების სიასთან, რომლებისთვისაც აუცილებელია ვიზა, განსაკუთრებით იმ ქვეყნებთან, რომლებიც წარმოადგენენ არალეგალურ მიგრაციას ან უსაფრთხოების რისკებს ევროკავშირში.“ - ნათქვამია რეკომენდაციაში.

დოკუმენტში საუბარია იმაზე, რომ  საქართველოსთან უვიზო რეჟიმით სარგებლობენ მთელი რიგი ქვეყნები (რუსეთი, ირანი, სალვადორი, ეკვადორი, იორდანია, ყაზახეთი, ქუვეითი, ყირგიზეთი, ლიბანი, ომანი, კატარი, აუდის არაბეთი, სამხრეთ აფრიკა, ტაჯიკეთი, ტაილანდი. თურქეთი, თურქმენეთი და უზბეკეთი), რომლებიც ევროკავშირისთვის მიგრაციის და უსაფრთხოების რისკის ქვეყნებს განეკუთვნებიან და მათი მოქალაქეები ევროკავშირში მოკლევადიანი მოგზაურობისთვის ვიზას საჭიროებენ.

როგორ უნდა იქნას გაგებული  ევროკომისიის ეს რეკომენდაცია და ვის მიემართება ის პირველ რიგში. როგორც  საერთაშორისო ურთიერთობების ექსპერტი გიორგი რუხაძე  მიიჩნევს, რეკომენდაცია სავიზო რეჟიმის გადახედვასთან დაკავშირებით, პირველ რიგში რუსეთს ეხება.

„ევროკავშირს ყოველთვის ჰქონდა რეკომენდაცია, რომ საქართველოს უვიზო რეჟიმი გაეუქმებინა, ან გაერთულებინა მაინც ისეთ ქვეყნებთან, რომელთანაც ევროკავშირს არ ჰქონდა უვიზო მიმოსვლა.

 ნაკლებად სავარაუდოა, რომ ჩვენს ხელისუფლებას რეაგირება ჰქონდეს  ამ რეკომენდაციებზე. საერთოდ არანაირი რეკომენდაციაც რომ არ ყოფილიყო, ის რაც მოხდა უკრაინაში ომის დაწყების შემდეგ და ის რაოდენობა რუსეთის მოქალაქეებისა, რომლებიც ქვეყანაში შემოვიდნენ,  უკვე ისედაც იქნებოდა ნებისმიერ სახელმწიფოსთვის რეაგირების საბაბი.  ეს პროცესი რომ დაწყებულიყო თუნდაც არა რუსეთიდან, საიდანაც ისედაც საფრთხე გვემუქრება, არამედ ნებისმიერი სხვა ქვეყნიდან, სავიზო რეჟიმი ხელისუფლებას მაინც უნდა შემოეღო. ასე რომ, არანაირი ილუზია არ მაქვს, რომ საქართველოს ხელისუფლება ამ რეკომენდაციას გაითვალისწინებს კი არა, საერთოდ რაიმე ფორმით რომ მოაწესრიგებს რუსეთიდან მოქალაქეების შემოდინებას,“ - განაცხადა გიორგი რუხაძემ.

ევროკომისიის მიერ მომზადებულ დოკუმენტში ასევე ნათქვამია ისიც, რომ ამ მიმართულებით ქვეყანას 2021 წელს  პროგრესი  არ ჰქონია.