დღეს, 14 დეკემბერს ევროპარლამენტი ასოცირების შეთანხმების შესრულების შესახებ რეზოლუციას უყრის კენჭს. ანგარიშის ავტორი ესტონელი ევროპარლამენტარი, სვენ მიკსერია (სოციალისტებისა და დემოკრატების პროგრესული ალიანსი) 13 დეკემბერს ევროპარლამენტში ამ საკითხზე დებატები გაიმართა.

რეზოლუციის პროექტს ევროპარლამენტის საგარეო ურთიერთბათა კომიტეტმა 8 ნოემბერს უყარა კენჭი. ტექსტში ლაპარაკია პოლიტიკურად მოტივირებულ მართლმსაჯულებაზე, როგორც მედიასაშუალებების წარმომადგენლების, ასევე ოპოზიციონერების წინააღმდეგ, დემოკრატიული პროცესების უკუსვლასა და ევროკავშირის კანდიდატის სტატუსის მიღებამდე შესასრულებელ პირობებზე.

ტექსტში მოხსენიებული არიან: ბიძინა ივანიშვილი, მიხეილ სააკაშვილი, ნიკა გვარამია, მამუკა ხაზარაძე, ბადრი ჯაფარიძე.

რეზოლუცია საქართველოს ექს-პრეზიდენტ მიხეილ სააკაშვილის ჰუმანიტარული მიზნებით გათავისუფლებისკენ მოუწოდებს.

დეოლიგარქიზაციის ქვეთავში ლაპარაკია კერძო ინტერესების გადაჭარბებულ ზეგავლენაზე საქართველოს პოლიტიკურ, ეკონომიკურ და საზოგადოებრივ ცხოვრებაში და იქვე ნახსენებია არა "ოლიგარქი", არამედ "საქართველოს ყოფილი პრემიერ-მინისტრი", ბიძინა ივანიშვილი. არ არის ნახსენები სანქციები, დეოლიგარქიზაცია ერთ-ერთ პრიორიტეტულ რეკომენდაციად არის მითითებული კანდიდატი ქვეყნის სტატუსის მინიჭებამდე.

ამასთან რეზოლუციის პროექტში შესულია ტელეკომპანია "მთავარი არხის" გენერალური დირექტორის ნიკა გვარამიას საკითხიც.

„[ევროპარლამენტი] გამოხატავს ღრმა შეშფოთებას იმის გამო, რომ 2022 წლის 2 ნოემბერს, სააპელაციო სასამართლომ ძალაში დატოვა ნიკა გვარამიას განაჩენი საეჭვო ბრალდებებით, მიუხედავად ამ საქმესთან დაკავშირებით წამოჭრილი არსებითი შეკითხვებისა და კერძოდ - ვადებთან და ბრალდებებთან დაკავშირებით“.

წყარო: radiotavisupleba.ge/