ევროკომისიამ საქართველოსთვის ევროკავშირის კანდიდატის სტატუსის მინიჭების რეკომენდაცია არ გასცა.
რაც ეხება უკრაინასა და მოლდოვას, ასოცირების ტრიოს ამ ორ ქვეყანასთან დაკავშირებით ევროკომისიის დასკვნა დადებითია.
საქართველოსთან დაკავშირებით კი, ევროკომისიის რეკომენდაცია არის — ევროპული პერსპექტივა და პირობები სტატუსის მინიჭებამდე.
როგორც წინასწარვე იყო ცნობილი, უკრაინისა და მოლდოვისგან განსხვავებული გადაწყვეტილება იქნებოდა მიღებული საქართველოსთან დაკავშირებით. ამგვარად ასოცირებული ტრიოდან საქრთველო ყველაზე ცუდ მდგომარეობაში აღმოჩნდა. ბრიუსელში გუშინვე შეთანხმდნენ, რომ უკრაინა და მოლდოვა მიიღებდნენ ევროკავშირის კანდიდატი ქვეყნის სტატუსს სავალდებულოდ შესასრულებელ პირობებთან ერთად. საქართველო კი ახლა მიიღებდა პირობებს და მომავალში კანდიდატის სტატუსის მინიჭების შანსს. ასეც მოხდა.
ევროკავშირის წევრი სახელმწიფოების ლიდერები ევროპული საბჭოს სხდომაზე საკითხს მომავალ კვირაში განიხილავენ.
ევროკომისია პირობების შესრულებას მონიტორინგს გაუწევს და პირველადი შეფასება სავარაუდოდ წლის ბოლოს გამოქვეყნდება.
საქართველოს პრემიერ-მინისტრმა ირაკლი ღარიბაშვილმა ქვეყნის ევროკავშირში გაწევრიანების განაცხადს ხელი 3 მარტს, მას შემდეგ მოაწერა, რუსეთის შეჭრის შემდეგ, 28 თებერვალს, უკრაინამ გააკეთა ანალოგიური განაცხადი. ევროკავშირში დაჩქარებული წესით გაწევრიანებაზე მოთხოვნა 3 მარტს წარადგინა მოლდოვამაც.