ევროკომისიის მოსაზრებაა: კანდიდატის სტატუსი უკრაინას და მოლდოვას, საქართველოს - არა. გაიგეთ რატომ.

ევროკომისიის დასკვნით, საქართველომ უნდა მიიღოს ევროკავშირში გაწევრიანების პერსპექტივა. თუმცა, უკრაინისა და მოლდოვისგან განსხვავებით, კანდიდატის სტატუსისთვის, 11 მოთხოვნა უნდა შეასრულოს.

ევროკომისიის რეკომენდაციით, საქართველო წევრობის კანდიდატი გახდება, თუკი:

• აღმოფხვრის პოლიტიკურ პოლარიზაციას. ამ საკითხებზე უნდა იმუშავოს ყველა პარტიამ, 19 აპრილის შეთანხმების სულისკვეთების დაცვით.
• ყველა სახელმწიფო ინსტიტუტი გამართულად იმუშავებს. გაიზრდება მათი დამოუკიდებლობა, ანგარიშვალდებულება და დემოკრატიული ზედამხველობა მათზე. ხელისუფლება გაითვალისწინებს ეუთო-ოდირის, ევროპის საბჭოსა და ვენეციის კომისიის დასკვნებს საარჩევნო სისტემაზე.
• მიიღებს გამჭვირვალე და ეფექტური სასამართლო რეფორმის სტრატეგიასა და სამოქმედო გეგმას. დაიწყებს მის განხორციელებას. უზრუნველყოფს სასამართლო სისტემის მთლიან და ჭეშმარიტ დამოუკიდებლობას, ანგარიშვალდებულებასა და მიუკერძოებლობას. ამ პროცესში სხვა პოლიტიკური პარტიებიც უნდა ჩაერთონ. სასამართლო ინსტიტუტებმა და პროკურატურამ დამოუკიდებლად და გამჭვრივალედ უნდა იმუშავონ. მოსამართლეები და იუსტიციის უზენაესი საბჭოს წევრები ასევე გამჭვირვალედ უნდა ინიშნებოდნენ.
• გააძლიერებს ანტი-კორუფციული საატენგოს დამოუკიდებლობას და ეფექტურად გამოიძიებს ელიტური კორუფციის შემთხვევებს. გააძლიერებს სპეციალურ საგამოძიებო სამსახურსა და პირადი მონაცემების დაცვის სამსახურს. უზრუნველყოფს მათ ინსტიტუციურ დამოუკიდებლობას.
• აიღებს და შეასრულებს “დე-ოლიგარქიზაციის” ვალდებულებას. აღმოფხვრის იმ გადაჭარებულ ზეგავლენას, რომელიც პირად ინტერესებს აქვთ ეკონომიკურ, პოლიტიკურ და საჯარო ცხოვრებაზე.
• გააძლიერებს ბრძოლას ორგანიზებულ დანაშაულთან და ეფექტურად გამოიძიებს სამართალდარღვევებს. სამართალდამცავი ორგანოები იქნებიან ანგარიშვალდებულები და გამჭვირვალე.
• შექმნის თავისუფალ, პროფესიონალურ, პლურალისტურ და დამოუკიდებელ მედიაგარემოს. სამართალწარმოება მედიასაშუალებების მფლობელების წინააღმდეგ უპასუხებს უმაღლეს სამართლებრივ სტანდარტებს. ხელისუფლება ეფექტურად და დროულად გამოიძიებს ჟურნალისტებზე ძალადობის საქმეებს.
• სასაწრაფოდ დაიცავს მოწყვლადი ჯგუფების ადამიანის უფლებებს. ეფექტურად გაასამართლებს მათზე მოძალადეებს და ამ ძალადობის დამკვეთებს.
• გააერთიანებს ძალისხმევას გენდერული თანასწორობისთვის და ქალთა წინააღმდეგ ძალადობასთან საბრძოველად.
• ჩართავს სამოქალაქო საზოგადოებას გადაწყვეტილებების მიღებაში "ყველა დონეზე".
  
• მიიღებს კანონს, რომელიც უბიძგებს ქართველ მოსამართლეებს, პროაქტიურად გაითვალისწინონ საკუთარ მსჯელობებში ადამიანის უფლებათა ევროპული სასამართლოს შეფასებები.
• ახალ სახალხო დამცველად დაინიშნება დამოუკიდებელი ადამიანი. დანიშვნა იქნება გამჭვირვალე, მისი სამსახური- ზეგავლენებისგან თავისუფალი.
  ევროკომისიის პრეზიდენტმა, ურსულა ფონ დერ ლაიენმა კომისიის შეფასების წარდგენისას თქვა, რომ საქართველოსთვის ევროპის კარი ღიაა და ახლა ჯერი მასზეა.

გადაწყვეტილება საქართველოსთვის ევროპული პერსპექტივის, (ხოლო უკრაინისია და მოლდოვისთვის - პექსპექტივასთან ერთად, კანდიდატის სტატუსის) მინიჭებაზე უნდა მიიღოს ევროპულმა საბჭომ, რომელიც აერთიანებს ევროკავშირის 27-ვე წევრი ქვეყნის ლიდერს. მათი შეხვედრა 23-24 ივნისს, ბრიუსელში გაიმართება.

ევროკომისიის მიერ გამოქვეყნებულ ოფიციალურ საბუთში ნათქვამია, რომ კომისია შეაფასებს საქართველოს პროგრესს 2022 წლის ბოლოს.

radiotavisupleba.ge