ევროპული საბჭო ითვალისწინებს ევროკომისიის მიერ უკრაინის, ასევე მოლდოვისა და საქართველოს ევროკავშირში წევრობის განაცხადებზე მოსაზრებების მომზადებას და ამ საკითხს ივნისის შეხვედრაზე დაუბრუნდება, – ამის შესახებ ნათქვამია ევროპული საბჭოს სხდომის შემდეგ გამოქვეყნებულ დასკვნით განცხადებაში.
„ევროპული საბჭო მტკიცედ გმობს უკრაინის წინააღმდეგ რუსეთის აგრესიის ომს. მოუწოდებს რუსეთს, დაუყოვნებლივ შეწყვიტოს თავისი განურჩეველი თავდასხმა მოქალაქეებზე და სამოქალაქო ინფრასტრუქტურაზე, დაუყოვნებლივ და უპირობოდ გაიყვანოს ყველა თავისი სამხედრო დანაყოფი და აღჭურვილობა უკრაინის მთელი ტერიტორიიდან საერთაშორისოდ აღიარებულ საზღვრებში. რუსეთის ძალების მიერ ჩადენილი სისასტიკეები, გამოწვეული ტანჯვა და ნგრევა აღუწერელია. ევროპული საბჭო მოუწოდებს რუსეთს, დაუყოვნებლივ დაუშვას ჰუმანიტარული წვდომა და უსაფრთხო გასასვლელი ყველა მოქალაქისთვის. ევროპული საბჭო ელოდება, რომ სრულად დაცული იქნება ჰუმანიტარული სამართალი, მათ შორის სამხედრო პატიმრებისადმი მოპყრობის შესახებ ჟენევის კონვენცია. ის ასევე მოუწოდებს რუსეთს, დაუყოვნებლივ დაუშვას რუსეთის მიერ იძულებით გადაყვანილი უკრაინის მოქალაქეების უსაფრთხო დაბრუნება“, – ნათქვამია განცხადებაში.
ევროპული საბჭო მხარდაჭერას უცხადებს სისხლის სამართლის საერთაშორისო სასამართლოს პროკურორის მუშაობას სამხედრო დანაშაულების გამოსაძიებლად და მიესალმება ერთობლივი საგამოძიებო ჯგუფის ჩამოყალიბებას, რომელსაც „ევროჯასტი“ უწევს კოორდინაციას.
„რუსეთი, ბელარუსი და ყველა პასუხისმგებელი პირი თავისი ქმედებებისთვის პასუხს აგებენ საერთაშორისო სამართლის მიხედვით“, – აღნიშნულია განცხადებაში.
ევროპული საბჭო მზადყოფნას გამოთქვამს, გააძლიეროს რუსეთსა და ბელარუსზე ზეწოლა, რათა უკრაინის წინააღმდეგ რუსეთის ომის შეაჩეროს. ევროპული საბჭო მოუწოდებს ყველა ქვეყანას, შეუერთდნენ ევროკავშირის სანქციებს.
„სანქციების გვერდის ავლის ან რუსეთის სხვა საშუალებებით დახმარების ნებისმიერი მცდელობა უნდა იქნას აღკვეთილი“, – ნათქვამია საბჭოს განცხადებაში.
დასკვნით განცხადებაში ასევე საუბარია სანქციების მეექვსე პაკეტზე, რომელიც რუსეთიდან ნედლი ნავთობისა და ნავთოპროდუქტების იმპორტის აკრძალვას ითვალისწინებს, მილსადენით მიწოდებული ნავთობისთვის დროებითი გამონაკლისით.
ევროპული საბჭო ასევე უკრაინის ფინანსური და ჰუმანიტარული დახმარების საჭიროების შესახებ აღნიშნავს და აცხადებს, რომ მზად არის, უკრაინას ახალი მაკროფინანსური დახმარების სახით ცხრა მილიარდი ევრო გამოუყოს 2022 წელს.
„უკრაინის რეკონსტრუქცია სამომავლოდ ქვეყნის აღსადგენად ყოვლისმომცველ მხარდაჭერას საჭიროებს. ევროკავშირი და მისი წევრი სახელმწიფოები მზად არიან, ამ მხრივ დიდი როლი შეასრულონ. შესაბამისად, განხილული უნდა იყოს უკრაინის რეკონსტრუქციის პლატფორმის შექმნა. მან უნდა გააერთიანოს უკრაინის მთავრობა, ევროკავშირი და მისი წევრი სახელმწიფოები, ევროპის საინვესტიციო ბანკი, ასევე საერთაშორისო პარტნიორები, ფინანსური ინსტიტუტები, ორგანიზაციები, ექსპერტები და დაინტერესებული მხარეები. რეკონსტრუქციისადმი ევროკავშირის მხარდაჭერა დაკავშირებული იქნება რეფორმებისა და ანტიკორუფციული ზომების შესრულებასთან მისი ევროპული გზის შესაბამისად“, – აღნიშნულია განცხადებაში.
ევროპული საბჭო მიესალმება წევრი ქვეყნების ძალისხმევას, რომელიც მიმართულია მათ ეროვნულ კანონმდებლობაში კონფისკაციის ზომების გათვალისწინებისკენ. ასევე მოუწოდებს საბჭოს, სწრაფად განიხილოს ევროკომისიის ინიციატივა ევროკავშირის სანქციების დარღვევისთვის სისხლის სამართლის ზომების შესახებ.
ევროკავშირი მიესალმება დამატებითი ვარიანტების შესწავლას ევროკავშირისა და საერთაშორისო სამართლის შესაბამისად, მათ შორის რუსული გაყინული აქტივების უკრაინის აღდგენის მხარდასაჭერად გამოყენების ვარიანტებს.
ევროკავშირი ასევე ყურადღებით აკვირდება უკრაინის წინააღმდეგ რუსეთის ომის გავლენას მეზობელ ქვეყნებზე და დასავლეთ ბალკანეთზე. ის ხაზს უსვამს მოლდოვის მხარდაჭერის საჭიროებას, რომელიც ენერგეტიკულ და ეკონომიკურ კრიზისს, ასევე ომის შედეგად მიგრაციულ ზეწოლას განიცდის.
ევროპული საბჭო 
