პარლამენტარი ცეზარ ჩოჩელი ე.წ აგენტების კანონს ეხმაურება და „კომერსანტთან“ აცხადებს, რომ მისი განხილვაც კი ქვეყნისთვის მავნებლური და დამღუპველია.
„ე.წ. უცხო ქვეყნის გავლენის აგენტების შესახებ კანონპროექტის განხილვაც კი ქვეყნისთვის მავნებლური და დამღუპველია! - კანონპროექტი ეწინააღმდეგება ქართველი ხალხის ევროპულ მომავალს და მისი მიღება შედის მხოლოდ და მხოლოდ რუსეთის და საქართველოს მტრების ინტერესებში! 90-იანი წლებიდან მოყოლებული დღემდე, არ მინახავს რუსეთის პოლიტიკის აქტიური მხარდამჭერების შვილებს და ახლობლებს განათლების მიღება მოეწადინებიათ რუსეთში. რაოდენ სამწუხაროც არ უნდა იყოს, ის ხალხი ვინც ინიციატივით გამოდის ამ კანონის მიღებით, მათი შვილები, ახლობლები ყველა სარგებლოს ევროპული სიკეთით. აქედან გამომდინარე ჩნდება კითხვა, რა არის ამ კანონის მიზანი? თვითონ მიიღონ ევროპული განათლება, თვითონ ჰქონდეთ ქონება ევროპაში, იცხოვრონ ევროპაში, ბიზნესი აწარმოონ ევროპაში და ჩვენ და ჩვენი შვილები დავრჩეთ რუსეთის კოლონიად? დღეს, როგორც არასდროს, ისე გვინდა ქართველ ხალხს ერთიანობა. ყველა, იმისდამიუხედავად ვის რა პოლიტიკური შეხედულება აქვს, ვის რა სოციალური და თანამდებობრივი მდგომარეობა, ყველა უნდა გავერთიანდეთ და ერთად უნდა ვუთხრათ ამ კანონს არა“, — განაცხადა ცეზარ ჩოჩელმა.
მისი თქმით, ყველამ ერთად უნდა ვიმუშაოთ საიმისოდ, რომ ჩვენი მომავალი იყოს, მხოლოდ და მხოლოდ ევროპა და ადგილი ევროატლანტიკურ სივრცეში, წინააღმდეგ შემთხვევაში ქვეყანას მომავალი არ აქვს.
„აქვე, მინდა გითხრათ, როგორც ოკუპირებული ახალგორის მკვიდრმა, 90-იანი წლებიდან მოყოლებული, რომ არა ევროპა, რომ არა ამერიკის მხარდაჭერა დღეს ჩვენი არსებობა კითხვის ნიშნის ქვეშ იქნებოდა. დღევანდელი კანონი ჰგავს კუდიანებზე ნადირობას. ჩვენ, როდესაც აქ უცხოურ აგენტებად ვაცხადებთ ადამიანებს მათი დამფინანსებლები ჩვენთან მტრულად განწყობილი ორგანიზაციები არიან? რომელთა წყალობითაც ფეხზეა დამდგარი ბიზნესი, სოფლის მეურნეობა, ჩვენი ქვეყნის თავდაცვის უნარიანობა, დემოკრატიზაციის პროცესები და ასე შემდეგ. თუ ეს ორგანიზაციები 2012 წლამდე და 2012 წელს ითვლებოდნენ დემოკრატიის მხარდამჭერ შუქურებად დღეს რა გვემართება? მინდა მოვუწოდო ყველა პატრიოტ ადამიანს, მიუხედავად თავისი სოციალური მდგომარეობისა, ეს იქნება ბიზნესის წარმომადგენელი, სახელისუფლებო მოხელე თუ სხვა. ყველამ ერთად ვიმუშაოთ საიმისოთ რომ ჩვენი მომავალი იყოს, მხოლოდ და მხოლოდ ევროპა და ადგილი ევროატლანტიკურ სივრცეში. წინააღმდეგ შემთხვევაში ქვეყანას მომავალი არ აქვს.
პ.ს მინდა მივმართო დღევანდელ ხელისუფლებას, ნუ დაუშვებენ იგივე შეცდომას, რაც დაუშვა ყველა წინამორბედმა - მათ მიერ მიღებული კანონები, მუშაობდნენ მათივე წინააღმდეგ. მინდა გულწრფელად გითხრათ, თუ წინა ხელისუფლების წარმომადგენლებს, ძალიან ბევრმა ქვეყანამ, ხელისუფლებიდან წასვლის, მერე შესთავაზა თავშესაფარი, თქვენ ამასაც ვერ მოესწრებით - გასაქცევი არსად გექნებათ. გავჩუმდი მაშინ, როცა მინგრევდით ბიზნესს გავჩუმდი მაშინ, როცა არ მომეცით ახალი პროეტების განვითარების საშუალება. არ გავჩუმდები დღეს, როცა გვართმევთ ევროპულ მომავალს“, — ამბობს ცეზარ ჩოჩელი.