„უნდა მოვახდინოთ რაღაც გონივრულ ზღვარზე ფასების ჩამოწევა... მინისტრებო დაიბარეთ მსხვილი იმპორტიორები,“ - ეს განცხადება პრემიერმა ირაკლი ღარიბაშვილმა 6 თებერვლის მთავრობის სხდომაზე გააკეთა, სადაც სურსათისა და ნავთობის იმპორტიორები ფასების განგებ გაზრდასა და ხალხის ხარჯზე გამდიდრებაში დაადანაშაულა.

რამდენად საფრთხის შემცველია პრემიერის ეს განცხადება თავისუფალი ბაზრისთვის. კომერსანტმა ამასთან დაკავშირებით კითხვა პარლამენტის საფინანსო-საბიუჯეტო კომიტეტის წევრს , „გირჩის“ წარმომადგენელს ალექსანდრე რაქვიაშვილს დაუსვა.

დეპუტატის თქმით, მთავრობაში კომპეტენციის და კვალიფიკაციის ნაკლებობაა საიმისოდ, რომ მიხვდნენ თუ რა საფრთხეები შეიძლება მოჰყვეს ფასების რეგულირებას.

„პირველ რიგში,  ეკონომიკური გუნდი ოცნების ყველაზე სუსტი მხარეა. ფინანსთა სამინისტრო ასე თუ ისე ნორმალურად მუშაობს, მაგრამ დანარჩენ უწყებებში სრული კატასტროფაა და ელემენტარული კვალიფიკაცია არ გააჩნია ადამიანებს, მათ შორის მინისტრებს. ამიტომ არ შეიძლება გამოვრიცხოთ, რომ პრემიერს ასეთმა არაკომპეტენტურმა ხალხმა ასეთი მავნებლური რჩევები მისცენ. არც ღარიბაშვილია ეკონომისტი, რომ მიხვდეს, თუ რა საფრთხეები მოჰყვება ფასების რეგულირებას. მითუმეტეს, რომ ფასების სტაბილურობა ეროვნული ბანკის პასუხისმგებლობის საკითხია, ამიტომ პრობლემის მოგვარების სურვილი მართლაც რომ ჰქონოდათ, სხვა გზებს აირჩევდნენ.

ისიც აღსანიშნავია, რომ მსხვილი ბიზნესმენები მთავრობასთან ყოველთვის ცდილობენ დალაგდნენ, ხოლო ნამდვილი ბიზნესმენები ასეთი „დალაგებით“ სულ ზარალდებიან. ამიტომ მე არ განვიხილავდი „ბიზნესს“ როგორც რაღაც ერთ მოთამაშეს. სავსებით შესაძლებელია, რომ ბიზნესმენებმა გამოიყენონ ეს განცხადება, რომ რეგულირებით კონკურენტები ჩამოიშორონ.   ცხადია, არც პოპულისტური მოტივი უნდა გამოვრიცხოთ,“- განაცხადა ალექსანდრე რაქვიაშვილმა.

ალექსანდრე რაქვიაშვილი სხვადასხვა „ბიზნეს ასოციაციებს“ ლობისტურ „კანტორებს“ უწოდებს და აცხადებს, რომ მათგან არც მთავრობის მნიშვნელოვანი კრიტიკა და არც თავისუფალი ბაზრის დაცვის მცდელობა არ ყოფილა. მთავრობასთან მოსალოდნელი „დალაგებას“ უკავშირებს დეპუტატი მსხვილი ბიზნესის მხრიდან პრემიერის განცხადებაზე დუმილსაც.

„სამწუხაროდ, მსხვილი ბიზნესმენები უმეტესწილად ლაგდებიან მთავრობასთან. მეტიც, ისინი არც არიან ბიზნესმენები, რადგან პატიოსანი ბიზნესმენი ფულს საქმის კეთებით შოულობს და არ ცდილობს მთავრობის გამოყენებით ადამიანები გაძარცვოს და კონკურენტები მოიშორონ. სხვადასხვა „ბიზნეს ასოციაციები“ კი ჩვეულებრივი ლობისტური კანტორები არიან, რომ კიდევ უფრო მარტივად დალაგდნენ მთავრობასთან. მათგან არასდროს მინახავს მთავრობის მნიშვნელოვანი კრიტიკა და თავისუფალი ბაზრის დაცვის მცდელობა,“- აღნიშნა დეპუტატმა.

ალექსანდრე რაქვიაშვილის თქმით, ის უწყებები, რომელთა გაცხადებული მიზანიც კონკურენციის ხელშეწყობა და მონოპოლიებთან ბრძოლაა, ამის საპირისპიროდ მოქმედებენ.

„ფასების კონტროლი ბოროტებაა. ფასების კონტროლი არ უნდა არსებობდეს და იქ, სადაც ეს კონტროლი გვაქვს, მაგალითად სემეკი, იქაც კონტროლი გასაუქმებელია. კონკურენციის სააგენტო კი არა მონოპოლიებს ებრძვის, არამედ არსებულ კომპანიებს ეხმარება კონკურენტების ჩამოშორებაში, სხვადასხვა რეგულაციების შემოღებით. თორემ ამ სააგენტოს მართლა კონკურენცია რომ აღელვებდეს, დანარჩენ მთავრობასთან ომი ექნებოდა,“ - განაცხადა რაქვიაშვილმა.