„ფლანგვის დეტექტორის“ პოდკასტში მკვლევარი ანა აბაშიძე აცხადებს, რომ ფოთის და ზუგდიდის სტადიონების ტენდერებსა და რეაბილიტაციაში 28.5 მილიონი ლარი დაიხარჯა. თუმცა, არც ერთი სტადიონი არ აკმაყოფილებს უეფას სტანდარტებს და არც ერთი ტენდერის პირობები არ შესრულებულა.
ანა აბაშიძე ქრონოლოგიურად იხსენებს ფოთის სტადიონის რეაბილიტაციასთან დაკავშირებულ დეტალებს:
2013 წელს მაჟორიტარი დეპუტატის ეკა ბესელიას წინასაარჩევნო დაპირება იყო, რომ ფოთს უეფას შესაფერისი სტანდარტების სტადიონი ექნებოდა. გამოცხადდა ტენდერი. ფოთის მერიამ შპს „საუკს“ 110 000 ლარი გადაუხადა და პროექტის შედგენა დაუკვეთა. მეორე ტენდერი გამოაცხადეს ამ პროექტის შეფასებისთვის. ტენდერში გაიმარჯვა შპს „ფოთის პროექტების და ხარჯთაღრიცხვის ექსპერტიზამ“, რომელსაც 3400 ლარი გადაუხადეს. ორივე კომპანიას ჰყავდა ერთი მფლობელი. ისე გამოვიდა, რომ ფოთის მერიამ ერთ კომპანიას დაუკვეთა პროექტის შედგენა და დაამტკიცებინა პროექტი კომპანიას, რომელსაც იგივე მფლობელი ჰყავდა.
2013 წელს „ნიუ ქონსტრაქშენი“ იგებს ტენდერს და ავანსის სახით აძლევენ 700 000 ლარს, რომ რეაბილიტაცია გაუკეთოს ფოთის ცენტრალურ სტადიონს. მალევე იწყება ამ კომპანიასთან დავა პირობების შეუსრულებლობის, თანხის მითვისებისა და ვადის გადაცილების ბრალდებით. ანა აბაშიძის თქმით, სასამართლო პროცესი დაიწყო, მაგრამ უცნობია დააბრუნა თუ არა კომპანიამ ეს ფული.
ანა აბაშიძის ინფორმაციით, 2014 წელს მეორე ტენდერი გამოცხადდა. ტენდერში გამარჯვებულ შპს „ხიდს“ავანსად 500 000 ლარს ურიცხავენ. ამ კომპანიის დირექტორს თეიმურაზ წივწივაძეს ამ ავანსის მითვისების ბრალდებით აკავებენ.
2017 წელს მესამე ტენდერს „ელიტა ბურჯი“ იგებს, რომელიც ბიძინა ივანიშვილის „ქართუ ფონდს“ ეკუთვნის. კომპანიამ 2-ჯერ გადაავადა პროექტის დასრულების თარიღი, თუმცა საქმე ბოლომდე არ მიუყვანია.
ამის შემდეგ, 2019 წელს ახალი ტენდერი ცხადდება, სადაც კვლავ უკონკურენტოდ იგებს შპს „მაკროკონსტრაქშენი“. მას 5 300 000 ლარს აძლევენ. საბოლოოდ აღმოჩნდა, რომ ფოთში დღემდე არ არსებობს უეფას III კატეგორიის შესაბამისი სტადიონი.
„ფლანგვის დეტექტორის“ ინფორმაციით, ჯამში 10 წლის განმავლობაში 8,5 მლნ ლარია დახარჯული და 4-დან მხოლოდ 1 ტრიბუნაა აშენებული.
რაც შეეხება ზუგდიდის სტადიონს „ფლანგვის დეტექტორის“ მონაცემებით, ზუგდიდის სტადიონის რეაბილიტაციისთვის 20 მლნ ლარამდე დაიხარჯა და სტადიონი დაუსრულებელი და მიტოვებულია.
2015 წელს ტენდერში შპს „დაგიმ“ გაიმარჯვა. მას 9 747 000 ლარი გადაუხადეს. 2017 წელს სტადიონის ჩაბარების შემდეგ აღმოჩნდა, რომ სტადიონი ხარვეზებით იყო აშენებული და ტენდერი ახლიდან უნდა გამოცხადებულიყო.
2019 წელს ახალი ტენდერი გამოცხადდა. ტენდერში ორი პრეტენდენტი იყო და გამარჯვებული „შპს მაქრო ქონსთრაქშენ“ გახდა, რომლისთვის გადასახდელ თანხად 9 900 000 მლნ ლარი განისაზღვრა.
„სამუშაოების დასრულების ვადად ხელშეკრულების დადებიდან 1 წელი განისაზღვრა, ანუ 2020 წლის ოქტომბერი. იმავე ვადებს ასახელებდა სამეგრელო-ზემო სვანეთის გუბერნატორი, ალექსანდრე მოწერელია და ამბობდა, რომ სტადიონის მშენებლობა 2020 წელს დასრულდებოდა, თუმცა სამუშაოები დასრულებული კვლავ არ არის და ინფორმაცია იმის შესახებ, თუ როდის შევა ზუგდიდის ცენტრალური სტადიონი ექსპლუატაციაში, ჯერჯერობით არავინ იცის“, - წერს ფლანგვის დეტექტორი.
„ეს არის მიტოვებულია ადგილი, სადაც ნაგავი ყრია, ბალახის საფარი გამხმარია. ზუგდიდის სტადიონი ერთ-ერთი ცხადი მაგალითია, რას ნიშნავს ფულის ფლანგვა, არაპროფესიონალიზმი, კორუფცია - ყველაფერი ერთად“, - აცხადებს ანა აბაშიძე.
ფოტო: ფლანგვის დეტექტორი