რუსეთის ვიცე-პრემიერმა და ენერგეტიკის მინისტრმა ალექსანდრ ნოვაკმა ამ დღეებში განაცხადა, რომ მოსკოვი გაზსადენ „ჩრდილოეთის ნაკადი-2“-ს სერტიფიცირების კუთხით გეგმა „ბ“-ს არ ცნობს, და პროცესს გეგმის მიხედვით მიყვება.

როდესაც მას დაუსვეს კითხვა მილსადენის ლიცენზირებაზე უარი თქმის შესაძლებლობაზე, მისი პასუხი იყო „ასეთი ვარიანტი არ განიხილება“.

„ჩვენ ვთვლით, რომ მილსადენი სერტიფიცირებისთვის დადგენილი განრიგის მიხედვით ამუშავდება“, - განაცხადა ნოვაკმა.

„ჩრდილოეთის ნაკადი-2“-ით რუსული გაზის გერმანიის გავლით ევროპაში მიწოდება იგეგმება. პროექტი სულ უფრო და უფრო პოლიტიზირებული ხდება, რადგანაც ბოლო თვეებში დაძაბულობა ნატოს და რუსეთს შორის ყოველდღიურად იზრდება.

სავარაუდოდ, გაზსადენის სერტიფიცირება 2022 წლის პირველ ნახევარში დასრულდება, თუმცა, მშენებლობა უკვე სექტემბერში ჩაბარდა, მილსადენი კი დღემდე უმოქმედოა, ნოემბერში გერმანულმა რეგულატორმა სამართლებრივ-პროცედურული საკითხების გამო სერტიფიცირება გადადო - კერძოდ, ის მოითხოვს გაზსადენის მმართველი კომპანიის მხრიდან ევროკავშირის შესაბამისი კანონმდებლობის შესრულებას, რასაც რუსული მხარე ყველანაირად ეწინააღმდეგება.

თუმცა, ბიუროკრატიული ბარიერები არაა ერთად-ერთი ფაქტორი, რომელიც გაზსადენის ამუშავებას აფერხებს. რუსეთის მიერ უკრაინის საზღვარზე 120 000-ანი ჯარის განლაგებამ, და ამით სამხედრო აგრესიის საფრთხის შექმნამ აშშ-ს და ევროპის სწრაფი რეაქცია გამოიწვია - ამ თამაშში ერთ-ერთი არგუმენტი სწორედ ახალი გაზსადენია.

რუსეთის პრეზიდენტი ვლადიმერ პუტინი აცხადებს, რომ ჯარების დისლოცირება საზღვარზე - ეს არა აგრესიისთვის მზადებაა, არამედ სიფრთხილის ზომა. თუმცა, ის ასევე ემუქრება ნატო-ს სამხედრო პასუხით იმ შემთხვევაში, თუ ალიანსი აღმოსავლეთით გაფართოებას განაგრძობს.

პუტინი დასავლეთისგან ყოფილი საბჭოთა რესპუბლიკებისთვის ნატო-ში გაწევრიანებაზე ოფიციალურდ უარის თქმას მოითხოვს ევროპა და ამერიკა უკრაინის წინააღმდეგ აგრესიის შემთხვევაში  რუსეთს სერიოზული სანქციებით ემუქრებიან.

დეკემბერში გერმანიის ეკონომიკის მინისტრმა რობერტ ჰაბეკმა რუსეთი გააფრთხილა, რომ უკრაინაზე თავდასხმის შემთხვევაში მას „საშინელი შედეგები ელის“. მოსალოდნელ სანქციებს შორის ერთ-ერთი - სწორედ „ჩრდილოეთის ნაკადი-2“-ს მუშაობის დაბლოკვაა. აშშ-ს პრეზიდენტი ჯო ბაიდენიც პუტინს „სერიოზული ეკონომიკური ზომებით“ დაემუქრა.

„ფაქტია, რომ გაზი ამ მილსადენით ჯერ არ მიდის, და ის არ მუშაობს, ეს კი ნიშნავს, რომ ის შესაძლებელია გამოყენებულ იქნას პუტინზე ზეწოლისთვის. ეს ბერკეტია დასავლეთის ხელში, რადგანაც, თუ პუტინს სურს პროექტის ამუშავება, სავარაუდოდ ის ასეთ დიდ რისკზე არ წავა, და უკრაინაში არ შეიჭრება“ - მიიჩნევს აშშ-ის პრეზიდენტის მრჩეველმა ეროვნული უსაფრთხოების საკითხებში ჯო სალივანი.

გაზი და ზოგადად ენერგომატარებლების საკითხი ყოველთვის იყო პუტინის მხრიდან დასავლეთზე ზეწოლის ერთ-ერთი მძლავრი პოლიტიკური იარაღი, თუმცა, მოვიდა დრო, დასავლეთმა გაიგოს, რომ ამ იარაღის გამოყენება თავად პუტინის წინააღმდეგაც შეიძლება.

Fox news