„ევროკავშირის საბჭომ გადაწყვიტა, აღიაროს საქართველოს ევროპული პერსპექტივა და მზადაა, კანდიდატის სტატუსი მიანიჭოს, როგორც კი დასახული პრიორიტეტები შესრულდება“, – ამის შესახებ ევროპული საბჭოს პრეზიდენტი, შარლ მიშელი „ტვიტერის“ გვერდზე წერს.
„ვულოცავ ქართველ ხალხს. ეს ისტორიული მომენტია ევროკავშირი – საქართველოს ურთიერთობებში: საქართველოს მომავალი ევროკავშირშია“,- აღნიშნულია შარლ მიშელის ტვიტერის პოსტში.
ევროკომისიის პრეზიდენტმა ურსულა ფონ დერ ლაიენმა „ტვიტერზე“ დაწერა — „დღეს ევროპისთვის კარგი დღეა, ვულოცავ პრეზიდენტ ზელენსკის, პრეზიდენტ სანდუს და პრემიერ-მინისტრ ღარიბაშვილს!“.
მისივე თქმით, აღნიშნული ქვეყნები არიან ევროპული ოჯახის ნაწილი და დღეს ლიდერების ისტორიულმა გადაწყვეტილებამ ეს დაადასტურა. „თქვენი ქვეყნები არიან ჩვენი ევროპული ოჯახის ნაწილი, დღეს ლიდერების ისტორიულმა გადაწყვეტილებამ ეს დაადასტურა“, – წერს ურსულა ფონ დერ ლაიენი.
ურსულა ფონ დერ ლაიენი აღნიშნავს, რომ ეს გადაწყვეტილება აძლიერებს უკრაინას, მოლდოვას და საქართველოს რუსული იმპერიალიზმის წინაშე, ეს აძლიერებს ევროპას. „ძალიან კმაყოფილი ვარ, რომ ლიდერებმა მხარი დაუჭირეს ჩვენს შეხედულებებს. უკრაინას, მოლდოვას და საქართველოს – ყველას აქვთ საქმე, ვიდრე შემდეგ ეტაპზე გადავლენ. ვიცი, რომ სწრაფად იმოქმედებენ. მათ იციან, რამდენად გადამწყვეტია ეს მათი დემოკრატიებისთვის, ეკონომიკისა და მოქალაქეებისთვის.
ეს გადაწყვეტილება ყველას გვაძლიერებს. ეს გადაწყვეტილება აძლიერებს უკრაინას, მოლდოვას და საქართველოს რუსული იმპერიალიზმის წინაშე. ეს აძლიერებს ევროპას, რადგან კიდევ ერთხელ აჩვენებს სამყაროს, რომ ჩვენ ერთიანები ვართ საგარეო საგრთხეების წინაშე“, – წერს ურსულა ფონ დერ ლაიენი.
გასულ კვირაში ევროპის კომისიამ გასცა რეკომენდაციები, უკრაინასა და მოლდოვას ევროკავშირის კანდიდატი ქვეყნის სტატუსი მიენიჭოს, საქართველომ კი რამდენიმე პირობა უნდა შეასრულოს, სანამ ევროკავშირი მისთვის კანდიდატის სტატუსის მინიჭების საკითხს განიხილავდეს. დღეს ბრიუსელის სამიტზე ევროკავშირის 27 წევრი ქვეყნის ლიდერებმა განიხილავენ წევრობაზე ასოცირებული ტრიოს განაცხადი და საბოლოო გადაწყვეტილება მიიღეს.