„ყველაზე მძაფრი და მასშტაბური დაპირისპირება მერობის კანდიდატებს შორის თბილისშია, ამასთანავე შედეგები სამომავლოდ ბევრი რამის განმსაზღვრელი იქნება“, -  ექსპერტმა ვახტანგ ძაბირაძე 2021 წლის ადგილობრივი თვითმმართველობის არჩევნებს აფასებს. იგი ვარაუდობს, რომ ყოფილი ექსპრემიერის, გიორგი გახარიას „ქართული ოცნების“ დატოვების და დამოუკიდებელ საარჩევნო სუბიექტად ჩამოყალიბების შემდეგ კახა კალაძის პირველი ტურში გამარჯვების შანსი შემცირდა.

„მდგომარეობას რანჟირებულად რომ შევხედოთ ჯერ-ჯერობით მაინც ასე გამოიყურება კანდიდატთა რეიტინგი - კალაძე, მელია, გახარია. ეს სამეულია რომლებიც ძირითადი კანდიდატები არიან და მათ შორის იქნება რეალური და გადამწყვეტი ბრძოლა. სანამ გახარია გადაწყვეტდა თბილისის მერობას, ძალიან მაღალი იყო იმის ალბათობა რომ კალაძე პირველივე ტურში გაიმარჯვებდა, მაგრამ გახარიას ფაქტორმა ვითარება მნიშვნელოვნად შეცვალა. დიდი ალბათობაა იმის, რომ იყოს მეორე ტური. მეორე ტურში როგორც ჩანს დაპირისპირება კახა კალაძესა და მელიას შორის იქნება, თუმცა მგონია, რომ მეორე ტურში კალაძეს გამარჯვება გარანტირებული აქვს.

 რაც შეეხება პროპორციულ ნაწილს აქ მდგომარეობა საკმაოდ რთულია. ჯამურად მაინც შესაძლოა, რომ საკრებულო იყოს ოპოზიციური. აქ მნიშვნელოვანი როლი მაჟორიტარებს ექნებათ. თუმცა, უმრავლესობას დიდი ალბათობით ქართულ ოცნება შეინარჩუნებს. შეიძლება მათ დაჭირდეთ კოალიციაში რომელიმე პოლიტიკურ ჯგუფთან შესვლა, მაგრამ ეს იქნება მომავალში“, - განმარტავს ვახტანგ ძაბირაძე.

ვახტანგ ძაბირაძე წინასაარჩვნო რეიტინგების შეფასებისას იმ ახალ სახეებზე ამახვილებს ყურადღებას, რომლებიც 2021 წლის ადგილობრივი თვითმმართველობის არჩევნებში მონაწილეობას პირველად იღებენ. ერთ-ერთი ასეთი კანდიდატი, ექსპერტის თქმით, ანა დოლიძეა. მისი თქმით, იუსტიციის უმაღლესი საბჭოს ყოფილ წევრს მაღალი ცნობადობა და საზოგადეობის კეთილგანწყობა აქვს.

„მე ვფიქრობ რომ ამ სამეულის შემდეგ ანა დოლიძე ყველაზე რეალური კანდიდატია. დოლიძეს მაღალი ცნობადობა აქვს, ნამდვილად დამოუკიდებელი კანდიდატია, ამიტომ მისადმი სიმპათიები გაცილებით დიდია ვიდრე დანარჩენი კანდიდატებისადმი, რა თქმა უნდა პირველ სამეულს არ ვგულისხმობ. მას შეიძლება პრეტენზიაც კი ჰქონდეს მესამე ადგილზე, გახარიასთან ჭიდილში. მათ შორის ძალიან დიდი სხვაობა შესაძლოა არც დაფიქსირდეს. ის საკმაოდ ცნობადი ფიგურაა არასამთავრობო ორგანიზაციებში მუშაობდა, ამერიკაში მიიღო განათლება და ყოველთვის აქტიური იყო საზოგადოებრივ ასპარეზზე. გამომდინარე აქედან ის საკმაოდ ნიჭიერი და ჩამოყალიბებული პოლიტიკოსია. მისი მინუსი არის ის, რომ მას პარტიული მხარდაჭერა არ აქვს, რადგან მისი პარტია ახალია.

რაც შეეხება ლელოს კანდიდატს ანა ბიბილაშვილს, ის პარტიული მხარდაჭერის იმედზე უნდა იყოს და ნაკლებად უნდა ჰქონდეს იმის იმედი, რომ ნეიტრალური ამომრჩეველი მხარს დაუჭერს. უცნობი კანდიდატია, ვერ მოესწრო მისი პოპულარიზება, საზოგადოებისთვის გაცნობა. ძალიან დიდმა უმრავლესობამ საერთოდ არ იცის ვინ არის. შეიძლება კარგი პროფესიონალია მაგრამ დაბალი ცნობადობა აქვს. როდესაც ცნობადობა დაბალი გაქვს შედეგიც შესაბამისი იქნება“, - აცხადებს ვახტანგ ძაბირაძე.

ვახტანგ ძაბირაძე ამბობს, რომ 2 ოქტომბრის შემდეგ გართულებები იქნება. მისი თქმით, როგორც ხელისუფლება ასევე ოპოზიციური პარტიებიც 3 ოქტომბერზე საუბრობენ. ექსპერტი პოლიტიკის საკითხებში ვარაუდობს, რომ გართულებები იქნება, რისი ერთ-ერთი მიზეზიც შეიძლება საქართველოს მესამე პრეზიდენტი იყოს.

„მედიის ყურადღება და მოსახლეობის ინტერესი გადასულია ჩამოვა თუ არა სააკაშვილი. ხალხს პროცესში ჩართვის სურვილი არ აქვს, უფრო დაკვირვების და მაყურებლის პოზიციიდან ჩნდება ეს ინტერესი. სხვა შემთხვევაა, როდესაც ადამიანს მოლოდინის ინტერესი აქვს - აი რომ ჩამოვა ჩვენ დავიწყებთ, ეს ინტერესი კი საზოგადოებაში არ არის. გართულებები რა თქმა უნდა იქნება, გამოსვლებსაც ველოდები, მაგრამ თუ ხელისუფლება უფრო დაკვირვებულად და ჭკვიანურად იმუშავებს არ ველოდები, რომ პროცესი ძალიან გაიწელება. არც იმას ველოდები, რომ ჩვენი დასავლელი პარტნიორები ოპოზიციის მხარდამჭერები იქნებიან. რეალურად დღეს ქვეყანაში მოთხოვნა არის სტაბილურ გარემოზე, როგორც ქვეყნის შიგნით ისე საერთაშორისო ასპარეზზე. თუ არჩევნებში კატასტროფული დარღვევები არ იქნა მაშინ ყველაფერი ჩვენი პარტნიორების მხრიდან შეფასდება კრიტიკულად, მაგრამ ხელისუფლებისთვის დადებითად“, - განმარტა ვახტანგ ძაბირაძემ.