ანაკლიას სჭირდება ძლიერი, პასუხისმგებლობიანი ინვესტორები, - აღნიშნულის შესახებ განცხადება რადიო „თავისუფლების“ ეთერში საქართველოს ყოფილმა პრემიერ-მინისტრმა გიორგი გახარიამ გააკეთა. გახარიას განმარტებით, ანაკლიის ღრმაწყლოვანი პორტი უნდა აშენდეს და თუ ანაკლიის პროექტთან ვინმეს საპირისპირო შეხედულება ან გარკვეული კითხვები გააჩნია, მათ იმის საშუალებაც აქვთ, რომ საპარლამენტო კომისიის შექმნაც დააინიცირონ და დეტალები გაარკვიონ.
„ანაკლია არის საქართველოსთვის სტრატეგიული მნიშვნელობის პროექტი, არამხოლოდ ეკონომიკური, არამედ გეოპოლიტიკური. ანაკლიას სჭირდება ძლიერი, პასუხისმგებლობიანი ინვესტორები და ანაკლიას სჭირდება ძლიერი სტრატეგიული თანამშრომლობა ინვესტორებთან. ანაკლია უნდა აშენდეს. ეს იყო ყოველთვის ჩემი პოზიცია, დანარჩენი არის რაღაც ტექნიკურ საკითხებზე დავა, რომელზედაც მე ყოველთვის მიდავია და ეს დავა, რომ დავასრულო ერთხელ და სამუდამოდ, ან თუ ვინმეს რაიმე საპირისპირო მოსაზრება აქვს, დღეს ეს ხალხი პოლიტიკაშია და ისინი არიან პარლამენტის წევრები, დააინიცირონ საპარლამენტო კომისია. მე გპირდებით, რომ ჩვენი საპარლამენტო ჯგუფი მხარს დაუჭერს და საეროდ პრობლემა არ იქნება.
ამ ტექნიკური საკითხის მოგვარება უნდა მომხდარიყო ქართველი გადასახადების გადამხდელების ხარჯზე. თქვენ, რომ უბრალოდ ნახოთ რამდენჯერ და ვის სასარგებლოდ შეიცვალა კრიტიკული პუნქტები დიდი საინვესტიციო კონტრაქტის, რომელიც ტენდერის საშუალებით მოიგო კონსორციუმმა, უბრალოდ ყველაფერს მიხვდებით. რამდენჯერ მოხდა გადავადება. საფუძველიც არ არსებობს იმის, რომ რაღაცა ფორმით ... ახლა ვიღაცეები გამოვლენ იჭორავებენ ამან ის თქვა, ამან ეს თქვა. არსებობს სასამართლო. თან ეს ხომ არის ისეთი კონტრაქტი, რომელიც არ განიხილება ქართულ სასამართლოში, ხომ არ ვენდობით ქართულ სასამართლოს, არც მე არ მომწონს. განიხილება საერთაშორისო სასამართლოში და იქ ვიდავოთ.
მე ვთვლი, რომ მაშინ, მე არა, მთელმა გუნდმა რაც გავაკეთეთ, ანაკლია როგორც სტრატეგიული პროექტი საქართველოსთვის გადავარჩინეთ. როგორც პერსპექტიული, ჩვენი შვილების პროექტი გადავარჩინეთ“, - განაცხადა გიორგი გახარიამ.