მიშა სააკაშვილის საქართველოში შემოსვლა არის სპეცღონისძიება, რომელიც არის „ოცნების“ მიერ დაგეგმილი, რომელსაც ჰქონდა კონკრეტული მიზანი - 2 ოქტომბრის არჩევნების შედეგებზე ზემოქმედება და ამ მიზანს, უნდა ვაღიარო, სცენარის ავტორმა მიაღწია, - ამის შესახებ პარტია „საქართველოსთვის“ ლიდერმა გიორგი გახარიამ ბრიფინგზე განაცხადა.
ამასთან, გახარია გამოეხმაურა საქართველოს პრემიერ-მინისტრის, ირაკლი ღარიბაშვილის გუშინდელ წერილს და აღნიშნა, რომ ეს წერილი მიხეილ სააკაშვილის დაკავებასთან დაკავშირებით „სულელური ვერსიის დამკვიდრებლადაა დაწერილი“.
„სააკაშვილის ამ „ვოიაჟს“ და „მასკარადს“ ერთადერთი მიზანი ჰქონდა - ეს იყო პოლიტიკური სპეცღონისძიება, რომელიც პირდაპირ მიზანმიმართული იყო არჩევნებზე ზემოქმედებისთვის. სამყაროში ასეთი დამთხვევების თუ ვინმეს გჯერათ - „ოქეი“, მაგრამ 1-ელ ოქტომბერს, 9 წლის თავზე დაკავებული მიშა სააკაშვილი, რომელიც როგორც მე ვიცი, 4 თუ 5 დღით ადრეა ქვეყანაში შემოსული - ვინაა ისეთი გამოუცდელი ჩვენს პოლიტკურ სივრცეში, რომ ეს ვერსია დაიჯეროს, სწორედ ამ გაუგონრად სულელური ვერსიის დასამკვიდრებლად იყო ეს წერილი დაწერილი“,- განაცხადა გახარიამ.
ამასთან, გიორგი გახარიას თქმით, ეს წერილი არა ღარიბაშვილის მიერ, არამედ „სხვა ადამიანის მიერ, სხვაგანაა დაწერილი“.
„როდესაც ქვეყნის პირველი პირი მსგავსი ეპისტოლარული ჟანრითაა დაკავებული, თან ყველას ხომ ესმის, რომ ეს სულ სხვაგან და სხვა ადამიანის მიერ დაწერილი სცენარია, ჩვეულებრივი მარიონეტია ამ სცენარში, ერთ-ერთი შემსრულებელია, ასეთი ბევრი მინახავს. ადამიანს, რომელიც სხვის მიერ დაწერილ წერილებს აქვეყნებს და მთელ სცენარში ჩვეულებივი მარიონეტია, რა შეფასება უნდა მივცე“,- განაცხადა გახარიამ.
გარდა ამისა, გახარიას განცხადებით, „ქვეყნის პირველ პირს წარმოდგენა არ აქვს, რა მიზნით და როდის შემოვიდა სააკაშვილი, რადგან ამ სცენარის ერთ-ერთი მარიონეტია, ისევე როგორც მიშა სააკაშვილი“.
„აზრზე არ არის, არ იცის. ყველაფერი კეთდება იმისთვის, რომ რაღაცნაირად ეს ყველაფერ „გაპრავდეს“,- განაცხადა გახარიამ.
ამასთან, სააკაშვილზე საუბრისას გახარია ხელისუფლებას მეტი პასუხისმგებლობისკენ მოუწოდებს.
„დიდი ხანია ვამბობ, რომ მიშა სააკაშვილი არის კომიკური პოლიტიკური პერსონაჟი. ეს ფაქტია. დიდი ხანია ასეა, ერთადერთი, ვინც მიშა სააკაშვილს აცოცხლებდა, იყო „ქართული ოცნება“ და გასაგებია რისთვის - ამ „მასკარადისთვის“, რომელიც მოგვიწყო. დღევანდელი მდგომარეობა ისაა, რომ მიშა კი არის და იყო ბოლო პერიოდის განმავლობაში კომიკური პერსონაჟი, მაგრამ „ოცნება“ ისე იქცევა, შეიძლება კარიკატურული პერსონაჟი გახდეს და ეს შეიძლება გახდეს ქვეყნის და სახელმწიფოს პრობლემა. მე მათ მოვუწოდებ, ცოტა უფრო პასუხისმგებლიანად მიუდგნენ“,- განაცხადა გახარიამ.
ipn.ge