„სტრატეგია აღმაშენებლის“ ლიდერის გიორგი ვაშაძის განცხადებით, 5-6 ივლისის მოვლენებზე და ოპერატორ ლექსო ლაშქარავას გარდაცვალებაზე საქართველოს პრემიერ- მინისტრის განცხადება „ანტიკონსტიტუციური, ანტისახელმწიფოებრივი და ანტიქრისტიანულია“.

„დღეს მან კიდევ ერთხელ გააკეთა წამქეზებლური განცხადება რადიკალური ჯგუფებისთვის, რომ მათ ქუჩაში ანგარიშწორება გააგრძელონ”,- განაცხადა გიორგი ვაშაძემ.

ვაშაძე პრემიერს მიმართავს და აღნიშნავს, რომ „ქართული ოცნება” არის ძალა, რომელმაც ოპერატორი ლექსო ლაშქარავა მოკლა.

„ბატონო ირაკლი, თქვენ და თქვენი გუნდი ხართ ძალა, ვინც მოკალით ლექსო ლაშქარავა. თქვენი ქმედებებით გააკეთეთ პირველი ის, რომ დაგეგმეთ ეს სპეცოპერაცია, მეორე - განცხადებებით წაახალისეთ აგრესიული ქმედებები, მესამე - დღემდე აგრძელებთ ამ აღვირახსნილ განცხადებებს.

თქვენ ხართ ძალა, რომელმაც ქრისტიანული სარწმუნოების საფარქვეშ, ფარისევლობით გინდათ შეინარჩუნოთ ხელისუფლება და ყველაფერს აკეთებთ იმისთვის, რომ ფეხქვეშ გათელოთ ადამიანის უფლებები. თქვენ თავს დაესხით ჟურნალისტებს რუსთაველზე, მოაწყეთ ჟურნალისტების ცემა-ტყეპა და ამისთვის აუცილებლად აგებთ პასუხს. დღესაც ცინიკურად უმტკიცებთ ხალხს აბსურდს, თითქოს გაწუხებთ ჩვენი ქვეყნის ბედი, თითქოს თქვენ გიყვართ სამშობლო, სწორედ თქვენი ქმედებებიდან გამომდინარე ლექსო არის გარდაცვლილი. თქვენ ეს ადამიანი მოკალით და კლავთ ყოველწუთიერად უტიფარი განცხადებებით.

ჩვენ, ჩვენი ფრაქცია ყველაფერს გავაკეთებთ იმისთვის, რომ ბოლომდე ჩამოგხსნათ ფარდა. სამ კონკრეტულ მექანიზმზე გვექნება ოპოზიციონერ კოლეგებთან მსჯელობა. ესენია: საგამოძიებო კომისია, საპარლამენტო დებატები - მობრძანდით და გაგვეცით პასუხი, თუ არ გეშინიათ და მესამე - უნდობლობის მექანიზმის წამოწყება, რაც ნიშნავს ახალი, დროებითი მთავრობის შექმნას და ვადამდელი არჩევნებისთვის მზადებას. მანამდე იქნება საკონსტიტუციო ცვლილების მიღება და სრულად პროპორციულ საარჩევნო სისტემაზე გადასვლა”,- განაცხადა ვაშაძემ.

IPN.GE