საქართველოს პრეზიდენტმა რამდენიმე დღის წინ ჩამოთვალა უპირატესად საქართველოს ხელისუფლების მიერ დაშვებული შეცდომები თუ არგადადგმული ნაბიჯები, რომლებმაც საქართველო კანდიდატის სტატუსთან დაკავშირებით არასასურველ შედეგამდე მიიყვანა.
საქართველოს ხელისუფლებასა და საერთაშორისო პარტნიორებს შორის თანდათან სულ უფრო მეტი პრობლემა რომ გროვდებოდა, ამაზე რადიო თავისუფლებასთან მუდმივად ლაპარაკობდნენ ექსპერტები თუ პოლიტიკოსები, რომლებიც მიმდინარე მოვლენებსა და საერთაშორისო პარტნიორების რეაქციებს ყურადღებით ადევნებდნენ თვალყურს.
პრობლემურ საკითხებს შორის არის:
„ქართული ოცნების“ მიერ „შარლ მიშელის შეთანხმების“ ცალმხრივი „ანულირება“, 2021 წლის ივლისში - „ოცნება“ აცხადებდა, რომ პროცესს იმის გამო გამოეთიშა, რომ დოკუმენტს თავის დროზე არ შეუერთდა „ერთიანი ნაციონალური მოძრაობა“ [ოპოზიციურმა პარტიამ დოკუმენტს სექტემბერში მოაწერა ხელი]. თუმცა „ოცნება“ ასევე აცხადებდა, რომ საერთაშორისო პარტნიორებმა დოკუმენტზე მათ მოტყუებით მოაწერინეს ხელი და, ასევე, ამ შეთანხმების მოთხოვნებს კონსტიტუციის ჩარჩოებიდან გაჰყავდა ქვეყანა;
„ქართულმა ოცნებამ“ არ გაიზიარა უზენაესი სასამართლოს მოსამართლეთა და იუსტიციის უმაღლესი საბჭოს წევრების ვაკანტური ადგილების შევსებასთან დაკავშირებული მრავალი შენიშვნა. მათი განმარტებებით, ყველაფერი კონსტიტუციისა და კანონის შესაბამისად ხდებოდა და საერთაშორისო პარტნიორები ითხოვდნენ იმას, რაც უკვე შესრულებულია;
„ქართული ოცნების“ მხრიდან მოხდა მთავარი პროკურორის დანიშვნის ახალი წესის იგნორირება საკონსტიტუციო ცვლილებებში, რომელსაც ასევე 2021 წლის 19 აპრილს ხელმოწერილი „შარლ მიშელის შეთანხმება“ ითვალისწინებდა;
საერთაშორისო პარტნიორების კრიტიკა შეეხებოდა იმ ფაქტს, რომ არ დაისაჯნენ (დღემდე არ არიან დასჯილი) 5 ივლისის ძალადობრივი აქციის ორგანიზატორები. „ოცნება“ აცხადებს, რომ ჟურნალისტების ცემის გამო ათობით ადამიანი მოხვდა ციხეში;
2021 წლის აგვისტოში, საქართველოს ხელისუფლებამ უარი თქვა ევროკავშირის მაკროსაფინანსო იაფი სესხის მორიგ ტრანშზე - 75 მილიონ ევროზე, არგუმენტად ეკონომიკის სწრაფად ზრდა დაასახელა. 21 სექტემბერს კი, ცნობილი გახდა, რომ სახელმწიფო იღებდა „აზიის განვითარების ბანკის“ 100-მილიონდოლარიან სესხს;
პრობლემა შექმნა ე.წ. სუსის ფაილების საკითხმა - ევროკავშირის ელჩმა, კარლ ჰარცელმა სექტემბერში აღნიშნა, რომ ე.წ. სუსის ფაილებში დიპლომატების საუბრების მოხვედრა მეგობრული სახელმწიფოს ქმედებას არ ჰგავს და ამის გამო საქართველოს ელჩი ევროკავშირის შტაბბინაშიც იყო დაბარებული. „ოცნება“ აცხადებს, რომ გამოძიება მიმდინარეობს და ჯერ კიდევ დასადგენია, ვინ ჩაიწერა და გაავრცელა ეს ფაილები.
საერთაშორისო პარტნიორების შეკითხვები და ეჭვები უკავშირდება პატიმრებს - ტელეკომპანია „მთავარი არხის“ დამფუძნებელ ნიკა გვარამიასა და საქართველოს ექსპრეზიდენტ მიხეილ სააკაშვილს. ევროპარლამენტის რეზოლუციაში გვარამიას განაჩენზე, „რომელიც ხაზს უსვამს საქართველოს სასამართლო სისტემის მიმართ მუდმივ უნდობლობას“, წამოყენებულია განაჩენის გადახედვის საკითხი; ხოლო სააკაშვილის შემთხვევაში ლაპარაკია ჯანმრთელობის მდგომარეობის იგნორირებაზე და მოთხოვნილია „ჰუმანიტარული მოსაზრებებით“ საზღვარგარეთ მკურნალობა. ყველას, ვინც ამ საკითხებით ინტერესდება და მათ შორის - ევროპარლამენტარებსაც, „ქართული ოცნება“ „კრიმინალების მფარველებსა“ და საქართველოს ომში ჩართვის მსურველებს უწოდებს.
ყველა იმ პრობლემას, რომელიც, მათ შორის - პრეზიდენტ ზურაბიშვილის შეფასებით, ხელისუფლების მოქმედებებისა თუ უმოქმედობის შედეგად წარმოიშვა, თან ერთვოდა მწვავე დაპირისპირება საერთაშორისო პარტნიორებთან, რომლის შედეგადაც საქართველომ თითქმის ყველა კარგი მეგობარი „გაანაწყენა“ და იზოლაციის რეალური საფრთხის წინაშე აღმოჩნდა.
„ქართული ოცნება“ და მისი მხარდამჭერები ბოლო ორი დღეა განსაკუთრებულად მწვავედ დაუპირისპირდნენ საქართველოს პრეზიდენტს, რომელმაც ვეტო დაადო ე.წ. მოსმენების შესახებ კანონს. „ოცნება“ ამბობს, რომ ვეტოს დაძლევა არ გაუჭირდება და დასძენს, რომ პრეზიდენტს ოპოზიციონერებისგან ვეღარაფრით ასხვავებს.
https://www.radiotavisupleba.ge/