უკრაინის ყოფილი პრეზიდენტი ვიქტორ იუშჩენკო ჟურნალისტ დმიტრი გორდონთან ინტერვიუში აცხადებს, რომ გული სტკივა იმის გამო, რომ საქართველო არ შედის იმ ქვეყნების რიცხვში, რომლებიც საომარ პირობებში კიევს მაქსიმალურ დახმარებას უწევენ. ინტერვიუდან ნაწყვეტებს რადიო თავისუფლება აქვეყნებს.
„მე მესმის, რომ ეს არის ეპიზოდი, მესმის, რომ საქართველო იქნება ისეთი, როგორზეც ვოცნებობთ და იქ იქნება ისეთი მთავრობა, ვისაც ტაშს დავუკრავთ, მაგრამ დღეს გული მტკივა", - განაცხადა იუშჩენკომ.
ინტერვიუში იუშჩენკო ამბობს, რომ 2007 წელს უკრაინამ საქართველოს ყველა ის იარაღი გადასცა, რასაც თბილისი ითხოვდა და დასძინა, რომ კარგად იცოდა, როგორი იქნებოდა პუტინისა და რუსეთის რეაქცია. „მიშას (სააკაშვილს) ვუთხარი: ეს არ არის ჩემი პირადი გადაწყვეტილება, ეს ჩემი ერის გადაწყვეტილებაა", - ამბობს იუშჩენკო.
ინტერვიუში უკრაინის პრეზიდენტი 2008 წლის ომსაც ახსენებს, როცა საქართველოში პოლონეთის პრეზიდენტთან და სხვა ევროპელ ლიდერებთან ერთად ჩამოვიდა. მაშინ საქართველოს მხარდაჭერა ერთიანობის ნიშანი იყო.
იუშჩენკომ ასევე გაიხსენა, თუ როგორ განიხილავდა პოლონეთის პრეზიდენტ ლეხ კაჩინსკისთან ერთად საქართველოსთვის ომის დროს შეთავაზებულ ექვსპუნქტიან გეგმას.
„როდესაც სარკოზი მოსკოვიდან ექვსპუნქტიანი გეგმით ჩამოფრინდა, მე და ლეხს გვქონდა ასეთი პოზიცია: ეს არის კაპიტულაცია, ეს არის საქართველოს კაპიტულაცია", - განაცხადა იუშჩენკომ. მიხეილ სააკაშვილის დაპატიმრებაზე საუბრისას მან, კერძოდ, თქვა, რომ თავის მეგობარს „ხასიათმა უღალატა."
„გული მტკივა ქართველი ერისა და მიშას გამო“, - განაცხადა ვიქტორ იუშჩენკომ.
70-ზე მეტ ევროპელ პოლიტიკოსს შორის, 2021 წლის ოქტომბერში ვიქტორ იუშჩენკომაც მოაწერა ხელი საქართველოს მესამე პრეზიდენტის, მიხეილ სააკაშვილის გათავისუფლების თხოვნით შედგენილ ღია წერილს, წერს რადიო თავისუფლება.