ჩვენ ვართ დამოუკიდებელი ქვეყანა, გვაქვს ჩვენი კონსტიტუცია, თავმოყვარეობა და სუვერენიტეტი და ნებისმიერ საერთაშორისო ინსტიტუციაში ამას სცემენ პატივს - ჩვენ ვისარგებლებთ კონსტიტუციით, შეთანხმებები აღარ იქნება ძალაში, - ამის შესახებ ჟურნალისტებთან საპარლამენტო უმრავლესობის წევრმა გურამ მაჭარაშვილმა განაცხადა, რითაც მაკროფინანსურ დახმარებასთან დაკავშირებით ოპოზიციის გუშინდელ განცხადებებს გამოეხმაურა.
როგორც მან აღნიშნა, მაკროფინანსურ დახმარებას საფრთხე არ ემუქრება. რაც შეეხება მართლმსაჯულების რეფორმას, ზოგადი ფრაზები ინკლუზიურობაზე დამაკმაყოფილებელი არ არის და საჭიროა დეტალურად ითქვას, რა არის გასაკეთებელი ამ მიმართულებით.
„ევროკავშირი, ნატო, ნებისმიერი საერთაშორისო ინსტიტუცია პატივს სცემს ჩვენს სუვერენიტეტს, დამოუკიდებლობას და საქართველოს კონსტიტუციას. ჩვენ სწორედ ამ ძირითადი კანონიდან გამოვალთ ყოველთვის და ვისარგებლებთ საქართველოს კონსტიტუციით, რომელიც არის ხალხის მიერ არჩეული პარლამენტის მიერ მიღებული. ამიტომ სხვა დანარჩენი განცხადებები, შეთანხმებები აღარ იქნება ძალაში. გამომდინარე იქიდან, რომ ერთხელ და სამუდამოდ ჩვენ უნდა ჩამოვყალიბდეთ სუვერენულ სახელმწიფოდ, რომელსაც პატივს უნდა სცემდეს საერთაშორისო საზოგადოება და ეს ასეც არის. ცალკეული პოლიტიკოსების შეხედულებები შეიძლება არსებობდეს, მაგრამ ეს არის მათი შეხედულებები. ჩვენ გვაქვს მინიმუმ 3000 წლიანი ისტორია, ვინც პატივს სცემს ჩვენს ღირებულებებს, ტრადიციებს და რაც მთავარია, სუვერენიტეტს. ბუნებრივიცაა, მათთან ვიქნებით პარტნიორულ ურთიერთობებში. ჩვენ 19 აპრილის შეთანხმების ვალდებულებები ცალმხრივად შევასრულეთ, დარჩა საკონსტიტუციო ცვლილებები, რომელიც იცით, ოპოზიციის გარეშე ვერ მოხერხდება, დანარჩენი ცალმხრივად შესრულებულია ჩვენი მხრიდან. მართლმსაჯულებასთან დაკავშირებით, არაერთხელ ვიკითხე, შეიძლება ვინმემ კონკრეტული წინადადება მითხრას, რა შეიძლება გაკეთდეს იმაზე მეტი, ვიდრე აქამდე გაკეთდა ან ვაპირებთ?! ზოგადი ფრაზები, რომ მეტო ინკლუზიურობაა საჭირო მართლმსაჯულების რეფორმაში, არ არის დამაკმაყოფილებელი. ვინმემ დეტალურად უნდა გვითხრას, რა უნდა გაკეთდეს, ვიღაც მოიხსნას, დაინიშნოს, რეფორმა რა კუთხით უნდა ჩატარდეს. ჩვენ გვაქვს კონსულტაციები საერთაშორისო პარტნიორებთან კანონმდებლობაში ცვლილებებთან დაკავშირებით, რაც ბოლოს განვახორციელეთ და ამას მივყვებით ბოლომდე,“ - განაცხადა მაჭარაშვილმა.
ცნობისათვის, ევროკავშირის წარმომადგენლობაში გამართული შეხვედრის შემდეგ, რომელსაც შარლ მიშელის წარმომადგენელი ესწრებოდა, ოპოზიციის წარმომადგენლებმა განაცხადეს, რომ შეხვედრაზე მაკროფინანსური დახმარების საკითხზე იყო საუბარი. მათი თქმით, თუ 19 აპრილის შეთანხმებით გათვალისწინებული ვალდებულებები არ შესრულდება, დახმარებას საქართველო ვერ მიიღებს.
ipn.ge