თუ ოპოზიცია მოახერხებს და საკონსტიტუციო ცვლილებებზე საგნობრივი და სწორი მსჯელობა გაიმართება, ვნახავთ, რა ბედი ეწევა პარლამენტში ინიცირებულ პროექტს, - ამის შესახებ ჟურნალისტებს „ქართული ოცნების“ დეპუტატმა გურამ მაჭარაშვილმა განუცხადა.
მაჭარაშვილის თქმით, ჯერი ახლა ოპოზიციაზეა - თუ როგორ მოიქცევა, როგორ გაერთიანდება ამა თუ იმ მოსაზრების გარშემო და როგორ დღის წესრიგს წარუდგენს საზოგადოებას.
როგორც მაჭარაშვილი აცხადებს, კონსტიტუციური კანონის პროექტის მიღება სწორედ ამაზე იქნება დამოკიდებული.
„საკონსტიტუციო ცვლილებები ინიცირებულია ჩვენს მიერ ოპოზიციის ნაწილთან ერთად. პროექტის მიხედვით, საკმაოდ დაწეულია საარჩევნო ბარიერი, ოპოზიციისთვის გაადვილებულია ფრაქციების შექმნის შესაძლებლობა, პარალელურად დგას გენპროკურორის არჩევისთვის კვორუმის გაზრდის წინადადება. გამომდინარე იქედან, რომ ოპოზიციის ძირითად ნაწილს გარკვეული ტიპის დესტრუქცია აქვს არჩეული, ვნახოთ, როგორ იქნება პროცესები არჩევნების შემდეგ. თუკი "ნაციონალური მოძრაობის" და სხვა პარტიების დღის წესრიგი კვლავ დესტრუქცია, პოლარიზება და პარლამენტის სხდომათა დარბაზში არეულობა იქნება, ბუნებრივია, ასეთ შემთხვევაში, საკონსტიტუციო ცვლილებების განხილვა და საგნობრივი მსჯელობა შეუძლებელი იქნება. საკონსტიტუციო ცვლილების მიღებას 113 ხმა სჭირდება. „ქართულ ოცნებას“ 84 ხმა აქვს, გამომდინარე აქედან, საკონსტიტუციო ცვლილებებს ერთი პოლიტიკური პარტიის მხარდაჭერა არ ეყოფა“, - განაცხადა გურამ მაჭარაშვილმა.
ipn.ge