ნატო-ს გენერალური მდივნის, იენს სტოლტენბერგის 2022 წლის ანგარიში გამოქვეყნდა, სადაც საქართველოზეც არის საუბარი. დოკუმენტში აღნიშნულია ის სამუშაო, რომელიც ჩრდილოატლანტიკურმა ალიანსმა გასული წლის განმავლობაში საქართველოსთან მიმართებაში განახორციელა.

როგორც ანგარიშშია ნათქვამი, საქართველო ნატო-ს ერთ-ერთი უახლოესი პარტნიორია და ალიანსში გაწევრიანებისკენ ისწრაფვის.

„დროთა განმავლობაში, პრაქტიკული თანამშრომლობის ფართო სპექტრმა მხარი დაუჭირა საქართველოს რეფორმების მცდელობებს და მიზანს ევროატლანტიკურ ინტეგრაციაში. უკრაინის წინააღმდეგ რუსეთის აგრესიული ომის შედეგად, გაუარესებული უსაფრთხოების გარემო მნიშვნელოვნად აისახება საქართველოზე.

ნატო-საქართველოს არსებითი პაკეტი არის ნატო-ს მთავარი ინსტრუმენტი საქართველოსთან პრაქტიკული თანამშრომლობისთვის. 2022 წელს მან განაგრძო საქართველოს თავდაცვისუნარიანობის გაძლიერება და თავსებადობის გაუმჯობესება, რაც მხარს უჭერდა ქვეყნის მზადებას ნატო-ში საბოლოო წევრობისთვის. მოკავშირეებისა და პარტნიორების მიერ უზრუნველყოფილმა, დაახლოებით 36 რეზიდენტმა და მოწვეულმა ექსპერტმა მხარი დაუჭირა ნატო-საქართველოს არსებითი პაკეტის განხორციელებას 2022 წელს, ხოლო საქართველომ წვლილი შეიტანა ნატო-ს რეაგირების ძალებში და ოპერაციაში „ზღვის მცველი“. ერთობლივი წვრთნისა და შეფასების ცენტრი ქართული სამხედრო ნაწილების სწავლებასა და შეფასებას ახორციელებდა. მარტში ერთობლივი წვრთნისა და შეფასების ცენტრმა წარმატებით უმასპინძლა ნატო-საქართველოს მესამე სწავლებას. თავდაცვის მშენებლობის სკოლამ მიიღო ინსტიტუციური აკრედიტაცია ნატო-ს ხარისხის უზრუნველყოფის სისტემის დანერგვით“, – ნათქვამია ანგარიშში.

ამასთან, ანგარიშში უკრაინისა და სხვა მოწყვლადი პარტნიორების მხარდაჭერაზეც არის საუბარი და ნათქვამია, რომ ნატო-ს ლიდერები ვალდებულნი არიან, გააგრძელონ პოლიტიკური და პრაქტიკული მხარდაჭერა უკრაინისადმი, რადგან ის იცავს თავის სუვერენიტეტს და ტერიტორიულ მთლიანობას რუსული აგრესიისგან. შეცვლილი უსაფრთხოების გარემოს გათვალისწინებით, ლიდერები ასევე შეთანხმდნენ ახალ ზომებზე, რათა გააძლიერონ მორგებული პოლიტიკური და პრაქტიკული მხარდაჭერა პარტნიორებისთვის, მათ შორის, ბოსნია და ჰერცეგოვინას, საქართველოს და მოლდოვას რესპუბლიკისთვის.

რაც შეეხება ენერგეტიკული უსაფრთხოების გაძლიერებას, ამ კონტექტში ხაზგასმულია Coherent Resilience 22 საქართველო, რომელსაც ივნისში, ნატო-ს ენერგეტიკული უსაფრთხოების დახელოვნების ცენტრმა და საქართველოს ეკონომიკისა და მდგრადი განვითარების სამინისტრომ უმასპინძლეს, 2017 და 2021 წლებში უკრაინაში მსგავსი ღონისძიებების შემდეგ. „ეს სწავლება გამიზნული იყო საქართველოს ეროვნული ხელისუფლების მხარდასაჭერად, შეეფასებინა და გაეძლიერებინა ჰიბრიდული საფრთხეების მიმართ, ელექტროენერგიისა და გაზის სისტემების მდგრადობა და გაეუმჯობესებინა მზაობა სხვადასხვა საგანგებო სიტუაციებისთვის. მრავალმა დაინტერესებულმა მხარემ მხარი დაუჭირა და მონაწილეობა მიიღო სწავლებაში, მათ შორის, ევროკომისიის ერთობლივი კვლევითმა ცენტრმა და შეერთებული შტატების საზღვაო ასპირანტურის სკოლამ“, – წერია დოკუმენტში.

გარდა ამისა, ანგარიშში ნათქვამია, რომ აპრილში მოკავშირეები შეთანხმდნენ, გაზარდონ პოლიტიკური და პრაქტიკული მხარდაჭერა ბოსნია და ჰერცეგოვინას, საქართველოსა და მოლდოვას რესპუბლიკის მიმართ, დაეხმარონ მათ გააძლიერონ თავიანთი ინსტიტუტები და მდგრადობა, განავითარონ შესაძლებლობები და შეინარჩუნონ პოლიტიკური დამოუკიდებლობა.

„ივნისში მადრიდის სამიტზე ნატო-ს ლიდერებმა მხარი დაუჭირეს ადაპტირებულ ზომებს ამ სამი ქვეყნის შემდგომი მხარდაჭერისთვის. სამიტზე მოკავშირეებმა ასევე დაუჭირეს მხარი თავდაცვის შესაძლებლობების გაძლიერების პაკეტის განახლებას ტუნისისთვის. დაიწყო თავდაცვის შესაძლებლობების განვითარების ახალი პაკეტი მავრიტანიისთვის, ამ ინიციატივის მიმღები ქვეყნების რიცხვი ექვსიდან შვიდამდე გაიზარდა. ესენია: ბოსნია და ჰერცეგოვინა, საქართველო, ერაყი, იორდანია, მავრიტანია, მოლდოვა და ტუნისი. ინიციატივის მიმღებია გაერო-ც“, – წერია ანგარიშში.

რაც შეეხება ნატო-ს ღია კარის პოლიტიკას, დოკუმენტის მიხედვით, ნატო-ს კარი გაწევრიანებისთვის ღია რჩება ყველა ევროპული დემოკრატიისთვის, რომლებიც იზიარებენ ალიანსის ღირებულებებს (ინდივიდუალური თავისუფლება, დემოკრატია და კანონის უზენაესობა), სურთ და შეუძლიათ, აიღონ წევრობის პასუხისმგებლობა და ვალდებულება, გააძლიერონ ჩრდილო ატლანტიკური ხელშეკრულების პრინციპები და რომლის გაწევრიანებამაც შეიძლება, ხელი შეუწყოს ჩრდილო ატლანტიკური სივრცის უსაფრთხოებას.

„ყველა ქვეყანა უნდა იყოს თავისუფალი, თავად აირჩიოს საკუთარი უსაფრთხოების ზომები, მათ შორის, შეუერთდეს თუ არა რომელიმე ხელშეკრულებას ან ალიანსს, როგორიცაა ნატო. წევრობის შესახებ გადაწყვეტილებები ნატო-ს ექსკლუზიურ უფლებამოსილებაშია და მოითხოვს ყველა მოკავშირის თანხმობას. არცერთ მესამე მხარეს არ აქვს უფლება ამაზე. 2022 წლის სტრატეგიულმა კონცეფციამ კიდევ ერთხელ დაადასტურა ნატო-ს ღია კარის პოლიტიკა და ხაზი გაუსვა, რომ ამ პოლიტიკამ უდავოდ გააძლიერა ალიანსი და ხელი შეუწყო მშვიდობასა და სტაბილურობას ევროატლანტიკურ სივრცეში. ბოსნია და ჰერცეგოვინა ამჟამად ერთადერთი ქვეყანაა, რომელიც მონაწილეობს ნატო-ს წევრობის სამოქმედო გეგმაში. მოკავშირეები რჩებიან ერთგული, საბოლოო ჯამში, მხარი დაუჭირონ საქართველოსა და უკრაინის ნატო-ში გაწევრიანებას, 2008 წლის ბუქარესტის სამიტზე მიღებული გადაწყვეტილებების შესაბამისად, რაც კიდევ ერთხელ დადასტურდა 2022 წლის მადრიდის სამიტზე. ისტორიული გადაწყვეტილებით, ნატო-მ 2022 წელს მიიწვია ფინეთი და შვედეთი ალიანსში გასაწევრიანებლად“, – ნათქვამია ანგარიშში.

ორმხრივ და რეგიონულ პარტნიორობაზე საუბრისას, იენს სტოლტენბერგი აღნიშნავს, რომ ნატო-მ შეიმუშავა კონკრეტული სტრუქტურები უკრაინასა და საქართველოსთან ურთიერთობისთვის.

„ნატო-ს პარტნიორობის ქსელი ვითარდებოდა 30 წელზე მეტი ხნის განმავლობაში, რაც არეგულირებს მასშტაბს, ინტენსივობას და ფოკუსს თითოეული პარტნიორის ინტერესებსა და შესაძლებლობებზე, ამასთან ასახავს ნატო-ს პრიორიტეტებს. ორმხრივი თანამშრომლობის დოკუმენტები ასახავს ნატო-სთან თითოეული პარტნიორის თანამშრომლობის ძირითად ამოცანებსა და მიზნებს. 2022 წელს ნატო-მ დაიწყო ინდივიდუალურად მორგებული პარტნიორობის პროგრამების განხორციელება, რომელიც შექმნილია ნატო-ს პარტნიორებთან თანამშრომლობის წარსამართად ოთხწლიანი ციკლის განმავლობაში. ევროატლანტიკურ სივრცეში მოკავშირეები აქტიურად არიან ჩართული 18 პარტნიორ ქვეყანასთან ევროატლანტიკური პარტნიორობის საბჭოსა და პარტნიორობა მშვიდობისთვის პროგრამის მეშვეობით. ამ პარტნიორებს შორის ნატო-მ შეიმუშავა კონკრეტული სტრუქტურები უკრაინასა და საქართველოსთან ურთიერთობისთვის“, – წერია ანგარიშში.

ამასთან, ანგარიშში საუბარია ნატო-ს კომუნიკაციებისა და ინფორმაციის სააგენტოზე და აღნიშნულია, რომ ნატო-ს კომუნიკაციებისა და ინფორმაციის სააგენტო ეხმარება ნატო-ს, შეინარჩუნოს თავისი ტექნოლოგიური უპირატესობა.

„ის პასუხისმგებელია იმის უზრუნველყოფაზე, რომ ალიანსს ჰქონდეს უსაფრთხო ქსელები, კომუნიკაციები და პროგრამული უზრუნველყოფა, უნდა უზრუნველყოს მშვიდობა და სტაბილურობა ყველა მოკავშირისთვის. სააგენტო ასევე მართავს ნატო-ს კიბერუსაფრთხოების ცენტრს, რომელიც პასუხისმგებელია ნატო-ს ქსელების 24/7 მონიტორინგისა და კიბერშეტევებისგან და ზიანის მომტანი აქტივობისგან დაცვაზე. ცენტრი აიდენტიფიცირებს და აღკვეთს პოტენციურ საფრთხეებს ექსპერტიზის, საფრთხეების ძიების, კიბერჰიგიენისა და კიბერუსაფრთხოების აუდიტის ექსპერტების მხარდაჭერით.

მოთხოვნის შესაბამისად, სააგენტო ასევე ეხმარება მოკავშირეებსა და პარტნიორ ქვეყნებს გააძლიერონ თავიანთი შესაძლებლობები ისეთ სფეროებში, როგორიცაა კიბერთავდაცვა. 2022 წელს ნატო-ს კომუნიკაციებისა და ინფორმაციის სააგენტო დაეხმარა უკრაინას კიბერრისკების შემცირებაში და ომის დროს კომუნიკაციის უნარის გაძლიერებაში და საინფორმაციო ტექნოლოგიების ინფრასტრუქტურის მოდერნიზებაში. სააგენტო ასევე დაეხმარა ფინეთსა და შვედეთს ნატო-ს გარემოსთან დაკავშირებაში და დაეხმარა საქართველოს დაემყარებინა გასაიდუმლოებული უსაფრთხო კომუნიკაცია მათ ეროვნულ ქსელსა და ნატო-ს შორის“, – წერია ნატო-ს გენერალური მდივნის, იენს სტოლტენბერგის ანგარიშში.

1tv.ge