ამერიკული კომპანიის Tesla დამფუძნებელმა ილონ მასკმა რობოტი–ჰუმანოიდი Tesla Bot–ის შექმნა დააანონსა. ანდროიდის პროტოტიპი უკვე 2022 წელს შეიძლება გამოჩნდეს, განაცხადა მასკმა Tesla–ს მიერ ორგანიზებულ „ხელოვნური ინტელექტის დღეზე“, რომელიც ხუთშაბათს, 19 აგვისტოს გაიმართა. მისი თქმით, Tesla Bot ნეირონულ ქსელთან და ახალ სუპერკომპიუტერთან Dojo დაკავშირებულ საქმეებს შეასრულებს.
Tesla Bot–ს შეეძლება სახიფათო, რუტინული და მოსაწყენი დავალებების შესრულება, რითაც დიდ გავლენას მოახდენს ეკონომიკაზე, თქვა მასკმა და განმარტა, რომ ადამიანების ასარჩევი იქნება, იმუშავებენ თუ არა ფიზიკურად.
რობოტის სიმაღლე 173 სმ იქნება, წონა – 57 კგ. სახის ადგილზე მას ეკრანი ექნება, რომელზეც სასარგებლო ინფორმაცია გამოისახება. ანდროიდი გადაადგილებას 8 კმ/სთ სიჩქარით შეძლებს, ხოლო მის მხედველობას თვითმავალი Tesla-ს კამერები უზრუნველყოფენ.
ზესწრაფი კომპიუტერი
Tesla-მ პრეზენტაციაზე თავისი ავტომატიზებული მართვის სისტემის სასწავლო ჩიპებიც წარმოადგინა. კომპანიის დირექტორმა განეშ ვენკატარამანანმა თქვა, რომ რამდენიმე წლის წინ სთხოვა თავის ერთ–ერთ ინჟინერს, შეექმნა ზესწრაფი შემსწავლელი კომპიუტერი, რის შემდეგაც დაიწყო Dojo-ს შემუშავება.
ახალი კომპიუტერული სისტემა მომავალი წლისთვის უნდა იყოს მზად.
DW